Prezidente Repúblika, Francisco Guterres Lú Olo. Imajen Tatoli/António Gonçalves

DILI, 28 janeiru 2020 (TATOLI)–Prezidente Repúblika, Francisco Guterres Lú Olo husu ba embaixadór sira ne’ebé sei reprezenta Estadu iha rai-li’ur atu hala’o sira-nia knaar bazeia ba prinsípiu no valór sira ne’ebé hakerek iha Konstituisaun RDTL, kona-ba relasaun internasionál, hanesan mós konvensaun internasionál sira ne’ebé Timor-Leste (TL) ratifika no tuir Planu Estratéjiku Dezenvolvimentu Nasionál 2030.

Komunikadu husi Prezidénsia Repúblika ne’ebé Agência Tatoli asesu, ohin, hateten Xefe Estadu hato’o ida-ne’e iha soru-mutuk ho Embaixadór Repúblika Demokrátiku Timor-Leste na’in-sia ne’ebé ohin simu pose.

Prezidente Repúblika hatutan, atu hatán ba tensaun oioin ne’ebé mosu iha relasaun internasionál, importante embaixadór sira mantein Timor-Leste iha pozisaun ida ekilíbriu entre interese nasaun sira ho influénsia boot iha mundu, respeita nasaun hotu no promove pás hodi kontribui ba estabilidade iha mundu.

Ba embaixadór sira, Prezidente Francisco Guterres Lú Olo ko’alia kona-ba importánsia relasaun ho nasaun sira ne’ebé sira sei haknaar-an ba no hameno ba embaixadór sira atu halo buat hotu ne’ebé sira bele, bazeia ba prinsípiu Timor-Leste hanesan nasaun hadomi pás, aprezenta Timor-Leste ba povu no nasaun sira-ne’e.

Prezidente Repúblika fó hanoin embaixadór sira atu hatutan serbisu di’ak sira ne’ebé embaixadór sesante sira halo no kontinua tau-matan ba kooperasaun no akordu sira ne’ebé Estadu estabelese ona ho nasaun hirak-ne’e.

Iha nasaun ne’ebé timoroan sira hela barak hodi serbisu ka estuda, Xefe Estadu husu embaixadór sira-nia atensaun espesiál hodi fasilita sira-nia nesesidade liuliu relasiona ho asuntu legál sira hanesan tratamentu pasaporte no selu-seluktan.

Xefe Estadu esplika mós situasaun jerál nasaun nian ba embaixadór sira no subliña maski situasaun polítika rai-laran oras ne’e iha hela faze ida-ne’ebé presiza diálogu barak entre entidade nasaun nian, maibé órgaun soberania Estadu kontinua hala’o nia serbisu no povu Timor-Leste hatudu nia matenek ho maturidade hasoru situasaun sira hanesan ne’e.

Embaixadór sira agradese lia-menon ne’ebé Prezidente Francisco Guterres Lú Olo hato’o no aproveita oportunidade ne’e esplika ba Xefe Estadu kooperasaun no planu ne’ebé sira idak-idak traxa tuir orientasaun Ministériu Negósiu Estranjeiru no Kooperasaun atu hametin, habelar no haburas relasaun ne’ebé Timor-Leste estabelese ona ho nasaun sira-ne’e.

Iha enkontru nia rohan, Prezidente Francisco Guterres Lú Olo hato’o saudasaun ba nia omólogu sira iha nasaun ne’ebé embaixadór sira-ne’e sei hala’o nia knaar.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here