Xefe Bankada Partidu Demokrátiku (PD), António da Conçeição ‘Kalohan'. Imajen TATOLI/António Gonçalves

DILI, 28 janeiru 2020 (TATOLI)—Xefe Bankada Parlamentár Partidu Demokrátiku (PD), Deputadu António da Conceição, prefere diálogu ida-ne’ebé substansiál atu solusiona inserteza polítika atuál.

“Ami-nia preferénsia ba diálogu maka atu hetan solusaun ida-ne’ebé maka substansiál ka solusaun ida sai hosi laran ka kle’an. Tanba ida-ne’e mak ami la buka partidu ruma atu ba ko’alia, tanba ukun ne’e responsabilidade ba vida nasaun nian”, nia ko’alia iha resintu Parlamentu Nasionál, tersa ne’e.

Nia esplika, diálogu substansiál ne’e atu hetan solusaun ida-ne’ebé tuir povu nia hakarak no garante sustentabilidade nasaun ne’e ba futuru.

Deputadu António da Conceição, prefere asuntu ne’e tanba preokupa situasaun ekonomia rai-laran, liuliu afeta povu nia moris no sasán sira-ne’ebé populasaun fa’an la folin. Nune’e mós normalidade entre ema ho ema ne’e ladún di’ak.

“Ita haree ema serbisu mós laiha motivasaun, tanba buat hotu-hotu inserteza”, nia haktuir.

Xefe Bankada Parlamentár PD ne’e afirma, diálogu la’ós baibain hodi rona malu de’it, maibé diálogu sira-ne’ebé maka estratéjiku.

“Diálogu ne’ebé ami defende ne’e diálogu ne’ebé maka tenke hatuur filafali pensamentu sira-ne’ebé hakarak ukun rasik-an ne’e”, nia subliña.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here