Embaixadora Timor-Leste ba Estadu Vatikanu, Juvita R. Barreto de A Santos. Imajen Tatoli/Egas Cristóvão

DILI, 28 janeiru 2020 (TATOLI)–Embaixadora dezignada Repúblika Demokrátika Timor-Leste (RDTL), Juvita R. Barreto de A Santos, promete sei husu Papa Francisco atu reza ba Timor-Leste, nune’e bele moris iha pás no armonia. 

Promesa ne’e embaixadora foun ne’e hato’o, hafoin simu pose husi Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pite, Dili, ohin.

“Ha’u sei husu Santu Padre atu reza ba Timor”, nia hateten.

Aleinde ne’e, hanesan reprezentante Estadu Timor-Leste iha Estadu Santa-Sé, Juvita hateten katak nia ba atu hatutan de’it konkordata ne’ebé maka Estadu Vatikanu no Estadu Timor-Leste halo tiha ona iha tinan 2015.

“Aleinde ne’e, atu haree balun ne’ebé seidauk halo, atu bele kompleta no halo tan”, nia dehan tan.

Nia mós informa katak bainhira Santu Padre nia ajenda sertu duni hakarak mai vizita Timor-Leste, Juvita hakarak atu sai manu-ain di’ak Timor nian ba Vatikanu hodi haree ba komunikasaun sira entre Estadu rua.

Hanesan feto ida, nia agradese ba Aman-Maromak ne’ebé fó biban hodi hetan knaar ida-ne’e, no nia sente orgullu tebes.

“Maibé, ha’u hatene katak, frakeza barak maka ha’u iha, tanba ne’e ha’u husu nafatin maluk sira, liuliu feto maluk sira-nia orasaun, atu ha’u bele susesu iha misaun ne’ebé ha’u sei hala’o”, Juvita husu.

Embaixadora ne’e mós informa katak ninia relasaun ho Irárkia Igreja Katólika Timor-Leste di’ak tebes, tanba dezde ki’ik kolleta formasaun husi misaun Saleziana.

Antes ne’e, embaixadora Juvita hala’o knaar nu’udar asesora iha Ministériu Turizmu, partisipa maka’as iha área empreendorizmu no hakbiit feto, iha setór privadu. Membru ativu iha organizasaun relijioza oioin, liuliu iha Konsellu Diretores Associação dos Devotos da Maria Auxiliadora dos Cristãos-Dom Bosco.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here