Adjuntu Sekretáriu Jerál Federasaun Futeból Timor-Leste (FFTL), Frederico Martins

DILI, 28 janeiru 2020 (TATOLI)–Adjuntu Sekretáriu Jerál Federasaun Futeból Timor-Leste (FFTL), Frederico Martins hateten maski mosu inserteza polítika iha Timor-Leste maibé la implika atividade FFTL nian.

“Impase politika bele mosu iha ita-nia nasaun ne’e, maibé la fó influénsia ba atividade hotu FFTL nian. Atividade kontinua la’o. Ha’u dehan la influénsia tanba ami hetan orsamentu kada tinan hosi Federatation International Football Association (FIFA) no Asian Football Confederation (AFC). Se sira mak la ajuda osan ne’e, atividade hotu sei paradu,” Frederico ba Agência Tatoli iha edifísiu FFTL, Bairru Formosa, Dili, tersa ne’e.

Nia dehan, FFTL la depende ba Governu tanba Orsamentu Jerál Estadu ne’ebé kada tinan aloka ba FFTL la másimu hanesan nasaun seluk ne’ebé orsamentu ba futeból kolokadu permanente.

“Ami dependénsia maka’as ba FIFA no AFC. Orsamentu Jerál Estadu ami la garantia. Hanesan nasaun seluk balun karik, sira-nia Governu tau osan ne’ebé klaru ba federasaun. Maibé, Timor-Leste laiha. Ne’ebé, laiha implikasaun bá iha ne’ebá. Ami-nia atividade sira la’o normál hanesan baibain,” nia tenik.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here