Embaixadór Timor-Lest ba Japaun, Ilídio Ximenes da Costa. Imajen Tatoli/Egas Cristóvão

DILI, 28 janeiru 2020 (TATOLI)–Embaixadór foun dezignadu Repúblika Demokrátika Timor-Leste ba Japaun, Ilídio Ximenes da Costa sei esforsu durante mandatu nu’udár embaixadór atu haruka traballadór timoroan ba Japaun, bazeia ba negosiasaun ne’ebé Ministériu Negósiu Estranjeiru no Kooperasaun (MNEK) ho Sekretaria Estadu Formasaun Profisionál no Empregu (SEFOPE) halo ona. 

Ilídio hato’o lia hirak-ne’e, hafoin simu pose nu’udár embaixadór foun Timor-Leste (TL) ba Japaun, iha Salaun Xina, Palásiu Prezidente Nicolau Lobato, Bairru Pité, Dili, ohin.

“Buat foun ne’ebé sei halo maka hanesan buka meiu, tanba loby ita iha tiha ona, nune’e MNEK ho SEFOPE bele asina akordu ida kona-ba haruka ita-nia traballadór timoroan sira bá Japaun. Ne’e katak sira sei presiza atu tuir formasaun, ajénsia saida mak presiza, ema nia kualifikasaun oinsá, ne’e maka sei halo preparasaun ba ida-ne’e”, Ilídio hateten.

Lee mós: Governu Japaun Responde Pozitivu Simu Traballadór Timoroan

Segundu, Ilídio mós iha hanoin ida atu koopera ho Japoneze kona-ba oinsá kaer ikan tuna tanba Japoneze koñesidu ho kaer ikan tuna.

“Ha’u sei loby atu ko’alia ho sira-nia Ministériu Negósiu Estranjeiru ho povu Japoneze, atu husu posibilidade bele ajuda ita iha área ida-ne’e”, nia promete.

Molok dezloka ba Japaun, Ilídio sei ko’alia ho SEFOPE atubele hakle’an kona-ba asuntu sira ne’ebé iha.

Ilídio mós deklara katak nia simu konfiansa atu reprezenta Estadu Timor-Leste iha Japaun no atu kontinua serbisu ne’ebé embaixadór sesante hala’o tiha ona.

“Ne’e atu dehan katak presiza hametin nafatin lasu amizade no relasaun di’ak ho Governu Japoneze. Aleinde ne’e, haree filafali mós programa balun ne’ebé uluk hala’o tiha ona katak iha buat foun balun ne’ebé presiza halo filafali”, nia subliña.

“Ita iha kooperasaun ho Governu Japaun iha área defeza, seguransa, edukasaun liuliu ba bolseiru timoroan sira, saúde, infraestrutura liuliu estrada no ponte inklui portu ho água no saneamentu”, Ilídio salienta.

Iha biban ne’e, Ilídio sente orgullu tanba hetan konfiansa hodi reprezenta Estadu Timor-Leste iha Japaun.

“Ha’u sente orgullu tanba esperiénsia mai husi ativista, sai mos jornalista, ikus mai hetan fali misaun foun iha área diplomasia nian”, Ilídio espresa.

Entretantu, antes ne’e mós, Embaixadór Ilídio Ximenes da Costa hala’o knaar nu’udar Sekretáriu Estadu Polítika Formasaun Profisionál no Empregu iha V no VI Governu Konstitusionál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here