Tribunal Distritál Dili.

DILI, 28 janeiru 2020 (TATOLI) – Tribunal Distritál Dili (TDD), ohin, hala’o julgamentu ba arguido YY nu’udar diretór ba empreza Thsawa D.Lda, tanba la kumpre nia devér hodi selu taxa ba Estadu nu’udar lei haruka.

Ho atitude YY nu’udar sidadaun Xinés ne’e fó prejuizu ba Estadu Timor-Leste ho montante $4.275,00. Tuir akuzasaun husi MP katak arguida YY husi provínsia Hunan-Xina mai Timor  hala’o  atividade negósiu iha maiu 2017.

Arguido arrenda edifísiu Zita Plaza hodi hala’o nia atividade negósiu nian, ne’ebé kada fulan empreza selu kustu ba arrenda ho montante $900.00. Arguida mós rekruta timor-oan nain lima hanesan funsionáriu ho vensimentu $300.00/fulan.

Konforme Lei Nu.08/2017, Lei Tributária, empreza/negosiante sira ne’ebé mak hala’o sira nia lukrativa iha obrigasaun atu selu impostu hanesan impostu salariál ba traballadór sira, impostu ba rendimentu, impostu ba retensaun final no impostu ba rendimentu final.

Realidadade empreza Thsawa D.Lda  seidauk kumpre nia obrigasaun atu selu impostu hanesan impostu salariál ba traballadór sira, impostu ba rendimentu, impostu ba retensaun final no impostu ba rendimentu final husi kompañia ne’ebé mak tenke selu %10.

Agora mós seidauk selu rendimentu fulan ho montante %0,5, husi rendimentu brutu/gross.

Arguido hatene katak halo hahalok ne’e kontra lei, maibé nia kontinua hala’o hodi mosu avaliasaun saida mak hakerek hela iha akuzasaun no hamosu prejuizu ekonomia ba
Estadu Timor-Leste.

Audiénsia julgamentu ne’e prezide husi juiz koletivu Ivan Suriaty, Edita Palmira ho Juiza estaziada ida, Ministériu Públiku reprezenta Prokuradór Hernani Rangel no arguido hetan asisténsia legal husi advogadu Rui Mendonça.

Jornalista : Domingos Piedade Freitas

Editór       : Francisco Simões

 

HAKEREK NO HATÁN

Please enter your comment!
Please enter your name here