Adjuntu Sekretáriu Jerál Federasaun Futeból Timor-Leste (FFTL), Frederico Martins

DILI, 27 janeiru 2020 (TATOLI)–Adjuntu Sekretáriu Jerál Federasaun Futeból Timor-Leste (FFTL), Frederico Martins hateten daudaun ne’e Timor-Leste sei menus treinadór iha area futeból.

Tanba ne’e, iha 2020, FFTL hakarak esforsu oinsá bele kontaktu ho Asian Football Confederation (AFC) nune’e bele prodús timoroan sira ne’ebé iha poténsia atu sai treinadór futeból barak liután.

“Kona-ba treinadór ita sei menus. Entaun, agora, federasaun book-an lalais ona atu haree hodi kontaktu ho AFC hodi rekruta instrutór ida para serbisu permanente ho ami nune’e bele fó treinamentu ba ita-nia treinadór sira bele hetan lalais lisensa C ou B. Ami kontaktu ona nia. Nini naran Gopa. Nia rasik hakarak ona. Nia sei mai Timor-Leste iha tempu besik,” Frederico dehan ba Agência Tatoli iha edifísiu FFTL, Bairru Formosa, Dili, segunda ne’e.

Nia dehan, prosesu hodi rekruta instrutór ne’e sei iha hela faze negosiasaun. Enkuantu ba fasilidade no saláriu sei selu hosi FFTL maibé seidauk hatene loloos nia montante.

“Se instrutór ne’e mai duni 2021, ne’e ita iha treinadór lisensa B ne’e iha ona. Posibilidade bele ba tan A. Ida-ne’e tuir planu estratéjiku FFTL nian,” nia haklaken.

Entretantu, númeru treinadór iha Timor-Leste seidauk sufisiente no maioria treinadór ho de’it lisensa C. Tanba ne’e, treinadór timoroan sei labele kaer selesaun nasionál seniór. Kritéria ba kaer selesaun nasionál seniór tenke lisensa B ho A.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here