Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 28 janeiru 2020 (TATOLI)–Tersa ne’e, Prezidente Repúblika, Francisco Guterres Lú Olo, fó pose ba embaixadór hamutuk na’in-sia, entretantu, na’in-lima maka seidauk simu pose tanba seidauk hetan agreement husi nasaun ne’ebé atu hala’o misaun. 

“Hafoin prosesu ne’ebé naruk, Estadu indika ona embaixadór sira-ne’e ba reprezenta ita-nia país. Ita iha embaixadór na’in-lima ne’ebé maka seidauk hetan agreement tanba país hirak-ne’e sei prosesa hela. Normalmente kuandu iha ona resposta, Ministériu Negósiu Estranjeiru no Kooperasaun (MNEK) sei kombina ho Prezidénsia Repúblika atubele realiza tomada pose”, Ministru Negósiu Estranjeiru no Kooperasaun, Dionísio da Costa Babo Soares hato’o asuntu ne’e, hafoin partisipa tomada pose ba embaixadór na’in-9, iha Salaun Xina, Palásiu Prezidente Nicolau Lobato, Bairru Pité, Dili.

Nia informa katak prosesu agreement ne’e depende ba ema ninian, ne’ebé la hanesan. Balun prosesu lalais de’it no balun presiza tempu.

Tanba ne’e, nia hatutan, idak-idak sei hala’o ninia knaar, iha rai idak-idak, ne’ebé sira sei haknaar-an, hodi reprezenta polítika esterna no polítika Estadu Timor-Leste.

“Sira na’in-sia ne’e ba iha nasaun sira ne’ebé maka ita agora daudaun laiha embaixadór tanba embaixada sira mamuk ona”, Dionísio akresenta.

Líder másimu MNEK ne’e subliña katak embaixadór sira-nia papél importante atu reprezenta Estadu no país. Segundu, fó hatene kona-ba polítika nia lala’ok, nasaun nia lala’ok. Terseiru maka atu tau atensaun maka’as ba timoroan hotu iha diáspora, hodi fasilita sira-nia serbisu ne’ebé maka iha relasaun ho interese timoroan nian. Kuartu, buka atu halo ligasaun, komunikasaun ho país sira-ne’e hotu, liuliu atu dezempeña polítika esterna ne’ebé iha relasaun ho partisipasaun Timor-Leste nian iha mundu internasionál no loke mós liras hodi halo kooperasaun ho nasaun hotu.

Nia informa katak, oras ne’e daudaun, Timor-Leste iha misaun 30 iha mundu, kompostu husi embaixada 26 no konsuladu 4.

Entretantu, Prezidente Repúblika, Francisco Guterres Lú Olo, iha 22 outubru 2018, aprova lista foun Xefe Misaun Diplomátika na’in-14 ne’ebé nomeadu husi Governu. Prezidente Repúblika simu lista foun husi Primeiru-Ministru iha 21 outubru.

Lista ne’e, Governu liuhusi Konsellu Ministru nomea Xefe Misaun hamutuk 14 ba nasaun sira hanesan Austrália, Reinu Unidu no Irlanda Norte, Suísa, Moçambique, Repúblika Portugueza, reprezentante permanente RDTL iha Sekretariadu Ezekutivu Países de Língua Portuguesa, República de Cabo Verde, Singapura, Japaun, Cambodia, Xina, Tailándia, Vatikanu no Laos.

Na’in-sia ne’ebé simu pose ohin mak hanesan Maria Natália Guterres Viegas Carrascalão ba nasaun Singapura, Hermenegildo Lopez ba Kamboja, Juvita Rodrigues Barreto de A. Gonçalves ba Estadu Vatikanu, Abrão dos Santos ba Repúblika Populár Xina, Isabel Amaral Guterres ba nasaun Portugál, Maria Renata Caldas de Jesus ba nasaun Laos, Inês Maria de Almeida ba nasaun Austrália, Gil da Costa ba nasaun Reinu Unidu no Irlanda Norte no Ilídio Ximenes da Costa ba nasaun Japaun.

Husi lista ne’e, na’in-lima ne’ebé seidauk simu pose maka embaixadór Timor-Leste ba Moçambique, Suísa, reprezentante Timor-Leste ba Sekretariadu Permanente iha CPLP, Tailándia no Repúblika Cabo Verde.

Kona-ba naran embaixadór sira ne’ebé seidauk simu pose, Dionísio lakohi temi tanba konsidera konfidensiál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here