Bolseira na'in-neen iha sidade Wuhan ne'ebé hasoru situasaun menus hahán. Imajen/Zelita Viegas.

DILI, 28 janeiru 2020 (TATOLI) – Bolseiru timoroan na’in-17 iha Sidade Wuhan, Provínsia Hubei, Xina, hetan ona kontaktu husi Governu Timor-Leste no Xina ba planu evakuasaun nian.

“Ami kontente tebes bele hetan kontaktu ona husi Embaixada Timór iha Xina no Embaixada Xina iha Timór no mós ami-nia inan-aman iha loron segunda ne’e no dada-lia ona ho ita-nia Ministru Negósiu Estranjeiru no Kooperasaun (MNEK) no mós ami rona ona katak MNEK halo ona enkontru ho liña ministeriál sira atu haree ba ami-nia situasaun ida ne’e”, bolseira Zelita Viegas ba Ajénsia TATOLI via mídia sosiál, ohin.

Nune’e, estudante ne’ebé hala’o estudu lisensiatura iha área Medisina iha Huazhong University of Science and Technology, sidade Wuhan ne’e dehan, agora sira hein de’it medida saída mak Governu sei foti ba oin no sempre iha konfiansa ba servisu tomak ne’ebé halo hodi espera katak bele evakua husi fatin refere.

Bolseiru 17 ne’e kontinua izola an no hakarak evakua urjente sai husi de’it Wuhan. “Ne’e mós to’o ona, importante mak sai tiha husi sidade tanba virus corona infetadu ba ema barak ona to’o lakon vida. Ami sujere ona ba ita-nia Governu atu evakua ami bá uluk Shanghai lai, depois mak ami sosa tíkete bá Timór”, nia hato’o.

Bolseiru sira ne’e ho esperansa katak Governu rai rua ne’e bele hetan lalais solusaun hodi hasai sira husi Wuhan.

“Ha’u ho estudante sira iha ne’e laiha ejijénsia barak atu husu ba Governu, iha momentu hanesan ne’e husu de’it foti no tau prioridade evakua ami, tanba ami hotu ne’ebé izola an ne’e, daudaun nia mentalidade ameasadu”, Zelita afirma ho triste.

Timoroan ne’ebé izola iha sidade Wuhan agora ne’e hamutuk na’in-17, maibé antes ne’e bolseiru ne’ebé hala’o estudu iha 19, maibé na’in-lima mak feriadu ne’ebé balun bá Timor, Indonézia no Portugál, nune’e estudante na’in-tolu husi sidade seluk ba feriadu iha Wuhan.

Iha loron 23 janeiru, tuku 10:00 dadeer, Governu Xina liuhusi Autoridade provínsia Hubei (Wuhan) husu hapara movimentu sirkulasaun hotu inklui transporte públiku iha sidade Wuhan laran hanesan aeroportu, train station no fronteira entre sidade sira blokeadu hotu.

Nune’e estudante sira ne’e iha de’it dormitóriu hodi prevene an husi virus ne’e, mas enfrenta mós ba menus hahán.

Notísia relevante : Izola iha Dormitóriu, Bolseiru Sira iha Sidade Wuhan Hahú Menus Hahán

Entretantu, Governu Timor-Leste liuhusi MNEK no Ministériu Ensinu Superiór Siénsia no Kultura mós halo ona enkontru ho Embaixada Xina iha Timor-Leste atu evakua bolseiru sira.

Governu liuhusi enkontru liña ministeriál sira diskute ona mekanizmu hodi halo evakuasaun ba bolseiru timoroan sira iha Wuhan, Xina. Nune’e, sei prepara kustu orsamentu evakuasaun atu aprezenta iha Konsellu-Ministru (KM) hodi hetan desizaun.

Tuir dadus Wuhan Pneumonia Geographical Distsribution ne’ebé autoridade Xina fó sai, ohin, ema hamutuk 2022-resin mak infetadu husi virus corona, 56-resin mate ona no kuaze 45-resin rekupera husi virus ne’e hafoin hetan tratamentu.

Coronavirus nu’udar família husi virus respiratóriu ne’ebé mak bele kauza moras hahú husi inus-been baibain to’o moras sériu sira hanesan síndroma respiratóriu médiu oriente no síndroma respiratóriu agudu grave (SARS).

Notísia relevante : Governu Sei Aprezenta Kustu Evakuasaun Estudante Bolseiru Iha Wuhan Ba KM

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here