Presidente Konsellu Administrasaun BNCTL, Brígido de Sousa.

DILI, 28 janeiru 2020 (TATOLI) – Banku Nasionál Komérsiu Timor-Leste (BNCTL) sei fó kréditu ba Asosiasaun Taksista Timor-Leste ne’ebé hetan lisensa halo operasaun iha Aeroportu Internasionál Nicolau Lobato, Comoro, ho jurus razoavel.

Prezidente Konsellu Administrasaun BNCTL, Brígido de Sousa, dehan halo ona aproximasaun ho asosiasaun taxista sira ne’e atu finansia sira hodi bele sosa foun karreta, nune’e tula pasajeiru hosi li’ur, liuliu turista sira mai vizita Timór.

“Agora daudauk, ami halo hela aproximasaun ho kooperativa taxi sira ne’ebé maka para iha aeroportu, sira iha estrutura no agora ne’e hetan autorizasaun tama iha aeroportu, la sala iha taxi 50-resin maka troka malu”, Brígido ba TATOLI iha Timor Plaza, segunda ne’e.

Nune’e, BNCTL sei ko’alia ho kooperativa ne’e hodi finansia para troka karreta sira ne’e, hadi’a kondisaun atu turista sira sa’e karreta moos no iha ár kondisionadu, no finansia mós hodi harii sentru ruma atu sira kontaktu malu no finanseiru ne’ebé BNCTL apoia liuhosi kréditu, no mós sei ajuda halo sira-nia proposta.

“Karreta ne’ebé sira prefere liu ne’e maka la’ós taxi sira hanesan agora ne’e, más karreta multi funsaun, ne’ebé sira hakarak hanesan diretamente bá munisípiu Baukau, entaun bele diretamente bá munisípiu tuir sira-nia pedidu”, Brígido afirma.

BNCTL iha kompromisu forte tebes atu tulun duni kooperativa taxi sira ne’e hodi bele hatudu imajen Timór nian.

“Ami hahú ho taxi 25 hodi koko lai, karik susesu maka ami sei ementa tan. Sira kontente tebetebes tanba sira dehan foin dahuluk banku ida halo aproximasaun ho sira, hodi buka solusaun ba sira-nia problema, sira mós rekoñese katak taxi ne’e tuan, ladún di’ak, ema turista sira sa’e sempre reklama katak karreta iis, entaun hakarak duni atu troka karreta”, katak.

Jurus ne’ebé BNCTL aplika maka entre porsentu 7 to’o 8 ba tinan lima no hakarak aumenta maka banku disponivel.

Ho ida ne’e, BNCTL prontu atu halo kooperasaun ho empreza sira ne’ebé hakarak fó kréditu karreta no motór ba populasaun.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here