Coronavirus

DILI, 28 janeiru 2020 (TATOLI)-Autoridade Aduaneira (AA) ka Alfándega Timor-Leste (TL) koopera ona ho ekipa liña ministeriál hanesan Ministériu Saúde, Organizasaun Saúde Mundiál (OSM), Diresaun Nasionál Servisu Migrasaun, Ministériu Agrikultura no Peska liu husi Diresaun Nasionál Kuarentena, hodi halo kontrolu másimu iha postu integradu iha Timor-Leste hodi prevene virus Corona.

Notísia Relevante : Prevene Virus Corona, SM Halo Pasarevista ba Sidadaun Estranjeru

Diretór Jerál Autoridade Aduaneira, José António Fátima Abílio, informa, koordenasaun servisu ekipa ne’ebé hahú implementa segunda horisehik too ohin loron, idak-idak hala’o nia knaar tuir lei haruka hodi asegura kontrolu másimu ba vizitante no sasán importasaun no esportasaun iha liu husi Aeroportu Prezidente Nicolau Lobato, Dili, Fronteira Batugadé, Mota Masin-Covalima no Postu Oesilu-Oe-Cusse no Portu Dili la’o di’ak tebes.

“Ita halo koordenasaun servisu ho liña ministeriál di’ak tebes. Idak-idak hala’o nia knaar no Ministériu Saúde maka halo pasa revista makas pasajeiru para prevene virus Corona ne’ebé perigu tebes ba ema nia vida,” hateten José António Fátima Abílio, ohin, ba jornalista sira nia servisu fatin, Dili.

Notísia Relevante : Virus Corona Afeta Ba Sistema Respiratóriu

Husi koordenasaun servisu ne’e, parte AA mós halo pasa revista makas ba sasán nesesidade báziku no sasán infraestrutura ne’ebé haruka mai Timor-Leste tenke la’o tuir regra no rekizitu.

Nia hatutan, durante halo koordenasaun servisu too agora ekipa seidauk rejista ema ruma maka sofre sintoma virus Corona.

Iha parte seluk, Diretór Abílio dehan, mezmu Timor-Leste hasoru hela impase polítika, maibé servisu Alfándega haree gráfika importasaun sasán nesesidade báziku no sasán infraestrutura husi rai li’ur mai Timor-Leste sei kontinua la’o normál.
Nia dehan, iha tinan 2019 liubá mezmu Timor-Leste iha situasaun impase nia laran, maibé Alfándega konsege hatama osan hamutuk Millaun $68 ba kofre Estadu.

Notísia Relevante : Prevene Virus Corona, Timoroan Hotu Tenke Kumpre Giaun OMS

Jornalista : Eugénio Pereira
Editór       : Francisco Simões

HAKEREK NO HATÁN

Please enter your comment!
Please enter your name here