Diretór Jerál Pekuária no Veterinária, MAP Domingos Gusmão. Imajen/Florencio Miranda Ximenes.

DILI, 27 janeiru 2020 (TATOLI) – Diretór Jerál Pekuária no Veterinária Ministériu Agrikultura no Peska (MAP), Domingos Gusmão, hateten utilizasaun Dotasaun Orsamentál Temporária (DOT) ne’ebé aloka MAP afeta ba programa vasinasaun no tratamentu ba animál sira.

“Orsamentu duodésimu ne’e afeta ba programa husi Diresaun Nasionál Veterináriu MAP nian atu halo vasinasaun no tratamentu ba animál sira iha territóriu laran tanba laiha vasina no medikamentu”, Diretór Jerál Domingos Gusmão ba Ajénsia TATOLI iha Comoro, ohin.

Domingos Gusmão dehan tanba duodésimu ne’e tenke uza hotu iha fulan ida nia laran, mas atu sosa ai-moruk vasina ne’e presiza prosesu liuhusi konkursu públiku ne’ebé fulan ida la biban atu ezekuta.

“Iha tinan ne’e, programa vasinasaun no tratamentu animál sira hein Orsamentu Jerál aprova mak foin bele hala’o”, katak.

Hodi dehan daudaun ne’e, sei iha vasina no médikamentu rezerva iha kada munisípiu no postu administrativu sira atu atende urjente ba balada sira.

Nune’e, nia husu ba populasaun ne’ebé presiza atu ekipa saúde animál iha kada munisípiu atende bele bá direta atu fó asisténsia téknika liuliu iha programa vasinasaun no tratamentu liuliu ba moras kólera fahi.

“Ita uza vasina no medikamentu rezerva lai hodi hein ita-nia orsamentu aprova”, katak.

Iha DOT janeiru 2020 ne’ebé aloka ba MAP hamutuk $1,185,890, fahe ba kategoria sira hanesan saláriu no vensimentu $297,161, sasán no serbisu $814,460, kapitál dezenvolvimentu $74,269.

Notísia relevante : MAP Vasina Animál Sira Regularmente

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here