Bandeira TL ho Austrália. Imajen: google

DILI, 27 janeiru 2020 (TATOLI)-Timor-Leste (TL) liuhusi Ministériu Negósiu Estranjéiru no Kooperasaun (MNEK) kompartilla prioridade bilaterál no rejionál entre ofisiál superiór sira, iha ámbitu kooperasaun sira liga ho komemorasaun loron Konsulta Populár no prezensa INTERFET (Forsa Manutensaun ba Pás, sigla inglés) ba tinan 20.

“Ohin, ofisiál sira husi Timor-Leste no Austrália hasoru malu iha Dili, hodi realiza sira-nia enkontru anuál ba ofisiál Superiór sira. Enkontru ne’ebé organiza husi Ministériu Negósiu Estranjéiru no Kooperasaun (MNEK) Timor-Leste nian, ne’e ko’alia kona-ba kooperasaun sira liga ho tinan liu ba nian ne’ebé signifikadu tebes, liliu iha komemorasaun loron Konsulta Populár no INTERFET ni’an ba tinan 20,” refere komunikadu imprensa, TATOLI asesu iha MNEK, segunda ne’e.

Ofisiál sira, tuir komunikadu ne’e katak elójia ho aumenta vizita bilaterál no diskusaun ne’ebé disponibiliza diólogu regulár nivel-altu entre lider sira.”Ofisiál sira hanoin lisuk kona-ba dezenvolvimentu ekonómia no estratéjiku iha Indo-Pasífiku no mós nia implikasaun ba nasaun rua ne’e”.

Nune’e, bazea ba komunikadu ne’e, sira konkorda atu eleva kooperasaun no esplora oportunidade atu serbisu hamutuk iha fórum sira rejionál no Internasionál ni’an.

“Austrália konfirmadu ho nia apoiu kontinua ba Timor-Leste. Ofisiál sira elojia ho atualizasaun ba sira-nia dezenvolvimentu kooperasaun ne’ebé la’o ona tinan barak, konsistente ho Timor-Leste nia métodu Nasaun-ni’an no Nasaun-lidera. Austrália reitera-nia kompromisu atu sai parseiru ida ne’ebé ho prátika di’ak liu no atu alina nia investimentu tuir prioridade sira Timor-Leste nian, ezemplu, hanesan dezenvolvimentu ekonómiku, mobilidade traballadór, kapitál sosiál no infraestrutura transformativu”.

Liga ba rezultadu enkontru entre Primeiru-Ministru Taur Matan Ruak no Primeiru-Ministru Scott Morrison iha Dili iha loron 30 fulan Agostu tinan 2019, ofisiál sira diskute maneira oioin atu aumenta kooperasaun bilaterál iha seguransa marítima nian no mós progresu positivu ne’ebé halo ona atu apoiu Timor-Leste nia dezenvolvimentu infraestrutura iha baze navál Portu Hera.

“Parte rua bemvinda Tratadu Fronteira Marítima, ne’ebé tama ona ba vigór no mós reafirma sira-nia kompromisu ba dezenvolvimentu Greater Sunrise tuir nia tempu”.

Nune’e, Ministériu Negósiu Estranjéiru no Komérsiu Austrália nian (DFAT) mak sei organiza fali enkontru Ofisiál Superiór sira nian tinan oin mai iha Austrália .

“Xefe Delegasaun husi Timor-Leste nian mak Señor Domingos Savio, Diretór-Jerál ba Asuntu Bilaterál iha Ministériu Negósiu Estranjéiru no Kooperasaun (MNEK). Xefe delegasaun Austrália nian mak Senora Julie Heckscher, Primeira Sekretária Ajuntu, Divizaun Sudeste Aziátiku, Ministériu Negósiu Estranjéiru no Komérsiu (DFAT) Austrália nian iha Canberra,” refere komunikadu.

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here