Edifisiu Tribunál Distritál Dili. Imajen/TATOLI

DILI, 27 janeiru  2020 (TATOLI) – Tribunal Distritál Dili (TDD), ohin, adia kazu julgamentu ba kazu  partisipasaun ekonomia negósiu, falsifikasaun dokumentu no burla agravada ne’ebé envolve arguido na’in  12.

Tribunal adia fali prosesu julgamentu ba loron 02 outubru 2020, tanba ajenda juiz koletivu okupadu no la marka prezensa husi prokuradór titular ba kazu ne’e.

Defensor Públiku, Estaquio Guterres. Imajen/Domingos Piedade

Defeza Eustáquio Guterres, informa, foin lalais ne’e, juis kaer prosesu iha sala julgamentu laran katak, tribunál adia julgamentu ba loron determinadu, 02 outubru 2020, hodi lee akuzasaun husi Ministériu Públiku no rona deklarasaun husi arguido sira.

Ba prosesu ne’e, Ministériu Públiku akuza arguido BDSF komete krime partisipasaun ekonomia no negósiu, arguido JMDCS komete krime falsifikasaun dokumentu, partisipasaun ekonomia, arguido JAXC komete krime falsifikasaun ekonomia. Nune’e, arguido seluk, hanesan ADFVX, JDC, NJ, RMDCP, VDCDC, CPCC, FDSC, HAT ho MT, komete rime burla agravada.

Audiénsia julgamentu ne’e, prezide husi Juiza Albertina Neves, Ministériu Públiku reprezenta prokuradór maibé la marka prezensa, arguido sira hetan asisténsia legal husi advogadu privadu no defensór públiku sira.

Tuir faktu ne’ebé arrola husi MP katak, arguido BSF assume kargu iha tinan 2010 nu’udar Sekretáriu Estadu ida, arguido JMCS asume kargu hanesan diretór ne’ebé tutela ba Sekretáriu Estadu refere, arguido AXC servisu hanesan funsionáriu iha Gabinete Sekretaria Estadu ne’e no  hahú iha tinan 2007 asume kargu hanesan Xefe Gabinete Sekretáriu Estadu nian.

Iha prosesu ezekusaun Orsamentu Jerál Estadu (OJE) ba Sekretaria  Estadu refere iha item ida kona-ba transferénsia públika ho montante osan variable nia utiliza ho nia kompeténsia hodi asina dokumentu halo adjudikasaun direita ba kompañia lubuk ida la liu husi rekizitu aprovizionamentu.

Fundus transferénsia publika ho montante $1,389,967.17 prepara hodi implementa planu demolisaun (demolição/pembongkaran) ba edifísiu estadu nian ho diskrisaun iha BoQ hanesan clearing, pika koluna, sinta, baku rahun lantai, ke’e rai ne’ebé aterru no mós tula ba karreta hodi ba soe kada item iha leten indika iha BoQ no iha kustu  kada distritu/munisípiu tuir dokumentu.

Iha loron 22 setembru 2010, arguido BSF iha altura ne’ebá sei assume kargu hanesan Sekretáriu Estadu ho orsamentu fundu transferénsia públika hodi adjudika direita ba kompañia projetu mão de obra no nia deside hodi asina kontratu ho kompañia hanesan empreza Lian Forte Unipesoal Lda. Hafoun Unipesoal Lda, Maun Alin Suai Unipesoal Lda, Novo Colega Unipesoal Lda, Erupari Construction Unipesoal Lda, Risa Unipesoal Lda, Riva Unipesoal Lda, Caimaloqui Unipesoal Lda, Matata Construction Unipesoal Lda, Metalic Construction Unipesoal Lda hodi implementa demolisaun iha munisípiu sira.

Depois asina kontratu refere iha loron 04 outubru 2010, BSF, JMCS, AXC foin commit no mós aprova CPV kona-ba projetu ne’e iha munisípiu 13 no  kada munisípiu ho montante orsamentu hanesan;

  1. Munisípiu Ermera $138,297.11 arguido BSF adjudika ba empreza Matata.
  2. Munisipiu Lequiça ($37,996.43) arguido BSF adjudika ba empreza Matalika.
  3. Munisipiu Bobonaro ($208,228.28) arguido BSF ajudika ba Empreza Hafoun.
  4. Munisípiu Viqueque ($26,031.21) arguida BSF adjudika ba empreza Riva Unipesoal Lda.
  5. Munisípiu Manatuto ($417,417.07) arguido BSF adjudika ba empreza Risa Unipesoal Lda.
  6. Munisípiu Baucau ($69,677.82) arguido BSF adjudika ba empreza Caimaloqui Unipesoal Lda.
  7. Munisípiu Covalima ($65,021.60) arguido BSF adjudika ba empreza Maun Alin Suai Lda.
  8. Munisípiu Lautem ($40,683.23) arguido BSF adjudika ba empreza Erupari Lda.
  9. Munisípiu Ainaro ($39,228.86) arguido BSF adjudika ba empreza Richi Unipesoal Lda.
  10. Munisípiu Oe-Cusseatua Rejiaun Administrativu Espesiál Oe-Cusse ambenu (RAEOA) ($87,500.00) arguido BSF adjudika ba empreza Grandenclve Unipesoal Lda.
  11. Munisípiu Dili ($95,743.27) arguido BSF adjudika ba empreza Lian Forte Unipesoal.
  12. Munisípiu Aileu ($118,101.91) arguido BSF adjudika ba empreza Cojoscar Unipesoal.
  13. Munisípiu Manufahi ($50,956.01)  arguido BSF adjudika ba kompañia Novo Colega Unipesoal Lda. Iha loron 11 Outubru 2011, arguido BSF deside halo kontratu ba kompañia Enclave Unispeal hodi implementa planu demolisaun ba iha Distritál Manatuto no Oe-Cusse.

At liu tan, arguido sira foin aprova CPV iha loron 4 Outubru 2010 mas tanba kontratu asina balun iha loron 22 Setembru 2010 no balun asina ikus 11 Outubru 2011 mas realidade kompañia implementa tiha ona projetu demolisaun no aprezenta pagamentu ba %50, hanesan kompañia Hafoun Unipesoal Ida, aprezenta pedidu pagamentu iha loron 4 Outubru 2010, kompañia Matata Unipesoal Lda, aprezenta pedidu pagamentu iha loron 7 Outubru 2010, kompañia Metalika Construction Lda aprezenta pedidu pagamentu iha loron 4 Outubru 2010 no  kompañia Caimaloqui Unipesoal Lda, aprezenta pedidu pagamentu iha loron 29 Setembru 2010.

Jornalista : Domingos Piedade Freitas

Editór       : Francisco Simões

 

HAKEREK NO HATÁN

Please enter your comment!
Please enter your name here