Diretór Jerál Arte no Kultura, Manuel Ximenes Smith. Imajen: Nelia Fernandes

DILI, 27 janeiru 2020 (TATOLI)-Diretór Jerál Arte no Kultura (SEAK), Manuel Ximenes Smith informa, SEAK sei halo levantamentu dadus kona-ba inséndiu iha Munisipiu Manatuto no Munisipiu Bobonaro liuliu iha Postu Administrativu Atabae no Cailaco.

“Insendu ne’e la’ós akontese de’it iha munisipiu sira ne’ebé kolega sira ba halo levantamentu tiha ona, ezemplu hanesan Ermera, Ainaro no Baucau, ne’ebé ita hatene katak inséndiu mós akontese iha Manatuto, Cailaco no Atabae. Tan ne’e, iha tempu besik, SEAK sei halo levantamentu dadus,” Diretór Jerál SEAK, Manuel Ximenes Smith, ba Agênsia TATOLI iha nia kna’ar fatin, ohin.

Nia informa, fulan kotuk ekipa SEAK dezloka tiha ona ba Munisipiu Ermera, Ainaro no Baucau maibé iha tempu badak SEAK sei haree ba Orsamentu Jeral Estadu (OJE) ida ne’e atu fasilita oinsa sira halo jestaun kona-ba halo intervensaun ba sasan lulik sira mak ne’ebé hetan estragus iha inséndiu ne’e rasik.

Nia hatutan, objetivu ekipa tun ba kampu ne’e la’os ba atu foti ka identifika uma lisan para atu fó apoiu iha intervensaun ne’e atu haree kona-ba sasán lulik ne’ebé hetan ameasa, estragu ona para atu bele alista hodi ita bele haree fila fali.

Tanba ne’e, nia dehan, iha biban ida ne’e ekipa SEAK sei tun fali hodi halo levantamentu dadus kona-ba inséndiu no sasán lulik sira ne’ebé hetan estragu iha Manatuto, Atabae no mós Cailaco.

“Tanba ita haree atividade barak loos seidauk hala’o mak iha fevereiru ne’e, SEAK sei halo programa sensibilizasaun ne’ebé ita mós orienta sira para sira tenke tun fila fali ba munisipiu ne’ebé ita identifika ona. Hakarak ka lakohi, ida ne’e tenke la’o atu bele hetan balansu serbisu iha área refere,” nia haktuir.

Nia reforsa, Timor-Leste tenke halo prevensaun no salva-guarda nomós proteje Timor-Leste nia valor kulturál ne’ebé ita-nia beiala sira husik hela, liuhusi sira-nia fiar ne’ebé durante ne’e sira ka’er to’o agora.

Notísia relevante:SEAK Halo Ona Levantamentu Dadus Iha Baucau No Ermera

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here