Diretór Diresaun Nasionál Organizasaun Urbana Ministériu Administrasaun Estatál, Hermínio Moniz Ribeiro. Imajen Tatoli/Julia Chatarina

DILI, 27 janeiru 2020 (TATOLI)–Projetu Rezídu Sólidu urbanu iha kapitál Dili daudaun ne’e ninia prosesu tama iha faze aprovizionamentu.

Diretór Nasionál Organizasaun Urbana, Hermínio Moniz Ribeiro, informa projetu ne’e ninia alokasaun orsamentu tama iha Fundu Infraestrutura hamutuk millaun $18, ne’ebé fazeadamente aloka iha 2019 no aloka mós iha tinan 2020.

“Ninia prosesu agora iha ona aprovizionamentu Komisaun Nasionál Aprovizionamentu (CNA-sigla Portugés) no tama ona iha faze avaliasaun dokumentu konkursu ho tipu ICB (International Competitive Bidding) ne’ebé mak fahe ba parte rua. Ida ba kolesaun ho transporte nian no ida tan ba ateru-kontroladu”, Hermínio ba Agência TATOLI iha ninia knaar fatin, Caicoli, segunda ne’e.

Notísia Relevante: MAE Aprezenta Modelu Foun Rekolla Lixu Ba KM

Nia informa tan,  avaliasaun ba projetu ne’e halo paralelu, maka hanesan parte interesadu ne’ebé maka iha laran hanesan Ministériu Administrasaun Estatál (MAE) no Munisípiu Dili hanesan na’in ba projetu, nune’e mós hosi parte tékniku sira no CNA rasik mak halo avaliasaun idak-idak hafoin CNA kompila hodi haree filafali ninia rezultadu.

“Avaliasaun hosi parte MAE hotu ona, tantu dokumentu ne’ebé iha ligasaun ho kolesaun transporte ka ateru-kontroladu haruka ona ba CNA no rezultadu ne’e CNA mak fó-sai maibé agora ami seidauk simu informasaun”, Diretór ne’e akresenta.

Nia subliña, agora iha Dili laran iha pur-volta kamioneta 50 maka loron-loron sirkula iha Dili laran hodi tula lixu bá iha Tibar, iha ne’ebé loron ida tula dala rua ba parte dadeer no lorokraik ninian.

“Provizóriu agora ita halo kolesaun ho transporta de’it bá iha Tibar tanba ita seidauk iha ateru-kontroladu, tanba ne’e lixu ne’ebé mak ita kolleta no transporta bá Tibar ne’e ita so’e de’it iha ne’ebá”, nia dehan tan.

Projetu Atu Introdús Modelu Foun Rekolla Lixu

Projetu ne’ebé hetan aprovasaun liuhosi desizaun Konsellu Ministru iha loron 8 maiu 2019, ho objetivu atu halo planu ba jestaun rezídu sólidu hodi propoin kona-ba modelu kontentór sira ne’ebé modernu no efisiente atu tau fo’er, karreta atu tula fo’er, ekipamentu móvel no ekipamentu ateru nian atu hadi’a padraun operasionál husi fatin soe fo’er nian iha Tibar.

Objetivu seluk tan husi planu ne’e atu hadi’a serbisu rekolla rezídu sólidu ne’ebé bá oin sei uza métodu rekolla mekánika.

Planu ne’e, buka mós atu transforma fatin fo’er iha Tibar ba aterru-kontrolu ida, tuir estratéjia integrada kona-ba tratamentu ba fo’er sira.

Planu kona-ba implementasaun jestaun rezídiu sólidu urbanu iha Dili, aprezenta katak benefísiu prinsipál husi planu ne’e mak hadi’a kualidade ambiente sidade, hadi’a saúde, hamenus risku inundasaun efisiénsia boot liután husi rekolla no jestaun rezídiu nian, liuhusi prátika nível internasionál nian.

Nune’e mós kria oportunidade empregu no posibilidade ba kreximentu turizmu nian liuhosi jestaun ne’ebé efikás no manutensaun ambiente nian.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here