Sesaun plenária Parlamentu Nasionál. Imajen/TATOLI

DILI, 27 janeiru 2020 (TATOLI)—Parlamentu Nasionál (PN), segunda ne’e, fó votu solidariedade ba povu Australianu ne’ebé iha semana hirak liubá hasoru inséndiu boot tebes.

Votu solidariedade ba númeru 2/2020 ne’e a-favór 52, kontra 0 no abstensaun 0.

“Ho nune’e, votu númeru 2/2020 aprovadu. Ida-ne’e mak ita-nia rezultadu”, Prezidente Parlamentu Nasionál, Arão Noé de Jesus da Costa Amaral, hateten liuhosi plenária Parlamentu Nasionál, segunda ne’e.

Xefe Bankada Parlamentár CNRT, Duarte Nunes, hateten inséndiu akontese iha Austrália konsideradu boot tebes.

“Ne’e hatudu ita-nia sentimentu solidariedade tanba nasaun viziña, hakarak ka lakohi ita sei viziñu nafatin. Ne’ebé, ha’u hanoin presiza tebes hato’o ita-nia solidariedade no ita mós sente sira-nia problema, liuliu sira ne’ebé mate, buat barak estraga”, Deputadu Duarte Nunes ne’ebé sai proponente ba asuntu ne’e fundamenta.

Vise-Xefe Bankada Parlamentár FRETILIN, Francisco Miranda Branco, hateten povu Australianu hasoru klamidade boot tebes.

“Dezastre ahi-han ne’e lori prejuizu boot ba sira, hamate ema na’in besik 40 no destroi sira-nia rikeza jeolójika animál liu biliaun ida maka mate, miliár ektare floresta maka destruidu. Ho klamidade ida-ne’e, hanesan viziñu sentimentu umanu liuhosi uma-fukun povu nian fó nia solidariedade ba vítima sira no nasaun Australianu nian”, Branco tenik.

Entretantu, Deputadu Bankada Parlamentár Partidu Libertasaun Populár (PLP), Abel Pires, hateten inséndiu boot ne’e afeta tebes vida povu Australianu nian.

“Ita hatene katak dezde ita ukun-an povu Australianu sira tun iha dalan fó sira-nia solidariedade ne’ebé boot tebes mai povu Timor-Leste. Ha’u lembra iha 1999 povu Australianu rihun ba rihun mak tun halo demonstrasaun hodi husu sira-nia Governu halo intervensaun mai ita. Ida-ne’e relembra fali katak povu Timor-Leste la haluha hato’o votu solidariedade ba povu Australianu ne’ebé hasoru inséndiu boot ne’e”, nia tenik.

Purtantu, Deputada Bankada Kmanek Haburas Unidade Nasionál Timor Oan (KHUNTO), Olinda Guterres, haklaken katak saida mak povu Australianu sente hanesan mós povu Timor sente, tanba ne’e votu solidariedade ne’e merese duni.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here