Prezidente MAEKOM, Rui Manuel Castro. Imajen/Eugénio Pereira

DILI, 27 janeiru 2020 (TATOLI) – Movimentu Asaun Ekonomia Komunitária (MAEKOM) sei apoia Instituto Profissional de Canossa (IPDC) hodi loke departamentu Turizmu no Ospitalidade atu fó oportunidade liu ba agrikultór nia oan sira hodi asesu ba edukasaun ne’ebé planeia atu loke iha tinan ne’e.

Prezidente MAEKOM, Rui Castro, hateten hakarak serbisu hamutuk ho IPDC hodi diversifika produtu agrikultura liuhusi institutu edukasaun ne’ebé formál ona, no iha departamentu ne’e sei aplika prátika maka barak liu hodi formandu sira ne’ebé kualidade di’ak sei sai hanesan mitra MAEKOM nian hodi dezenvolve negósiu barak liután iha Timor-Leste.

“MAEKOM haree eskola kulinária ne’e importante tanba ita bele iha produtu agrikultura, pekuária, peska no seluk tan, bainhira ita la akumula produtu sira ne’e hodi sai hahán oioin maka produtu sira ne’e nia valór ladún aas”, Rui Castro ba TATOLI hafoin hasoru malu ho lideransa IPDC iha Manleuana, Dili, ohin

Atu diversifika produtu presiza ema nia koñesimentu, esperiénsia no atu hetan sira ne’e hotu presiza tuir formasaun ida ne’ebé foka no integrada, ho ida ne’e, hafoin finaliza estudu sira bele sai emprendedór foun ne’ebé kualidade no sai autór ba dezenvolvimentu.

Emprezáriu timoroan ne’e iha esperansa katak ho kooperasaun entre MAEKOM ho IPDC sei prodús timoroan ne’ebé kualidade no matenek-na’in sira ne’e mai hosi povu toos-na’in no povu hakiak-na’in nia oan.

“Eskola ne’ebé kualidade ne’e la’ós idéntiku ho família hosi ema boot, riku nia oan, maibé eskola kualidade tenke idéntiku ho povu nia oan. Tan ne’e, eskola kualidade nia na’in maka povu toos-na’in ho hakiak-na’in sira-nia oan. Se ida ne’e akontese iha IPDC, mudansa loloos maka ida ne’e no ne’e maka doutrina Santa Bakhita no Santa Madalena de Canossa nian”, Rui Castro hatete.

Husi kooperasaun ne’e, nia dehan MAEKOM sei hetan amigu barak, jerasaun foun barak hodi hatutan MAEKOM nia misaun iha futuru, MAEKOM nia membru sira-nia produtu sei folin barak liután tanba iha rede negósiu ne’ebé aumenta.

“MAEKOM ho IPDC hahú ho diskusaun informál, formál no agora formaliza ona tuir ida-idak nia knaar no responsabilidade, no sei la’o nafatin to’o eskola ne’e hahú no sei metin ba nafatin”,  Rui Castro garante.

Reitora Ensinu Superiór Privadu IPDC, Ervinia Martins Brito, hateten estrutura IPDC no Fundasaun Canossa realiza ona enkontru ba estabelesimentu departamentu ho diploma 3 ne’e, tanba IPDC nia ezisténsia tinan 16 ona no iha departamentu rua de’it.

“Ne’ebé ami hanoin ona atu aumenta tan kursu foun, entaun ami liu ona iha estudu viabilidade ida. Ami haree hamutuk saida maka estudante sira-nia interese liu hanesan estudante sekundária sira, aléinde sira barak hakarak área enfermajen, direitu, más barak mós hakarak ba iha área turizmu, más turizmu ne’e iha institutu seluk iha tiha ona, más IPDC haree turizmu ne’e iha nia espesialidade iha saida? Entaun, iha diskusaun lubuk ida no ami iha kantina ida ne’ebé favorese no sai hanesan fatin treinamentu no laboratóriu, entaun ami deside loke kulinária”, salienta.

Reitora ne’e afirma daudaun ne’e, prepara ona kurríkulu no rekursu umanu hanesan ba matéria jerál no ba matéria iha área profisionál no espesialidade ba departamentu nian.

IPDC serbisu hamutuk ho MAEKOM no universidade Majapahit Indonézia, tanba sira sai hanesan referénsia para estuda sira-nia kurríkulu, maske IPDC nia rasik iha ona.

Nune’e, IPDC koopera ho MAEKOM tanba objetivu maka hosi departamentu ne’e fó benefísiu barak ba povu nia oan ne’ebé bele hetan posibilidade atu eskola, no ida ne’e hanoin ne’ebé di’ak liga mós ho prinsípiu IPDC nian katak oinsá maka atu hatán ba ema sira ne’ebé laiha kbiit atu asesu ba edukasaun, tanba MAEKOM dehan povu nia oan laiha osan atu selu, más bele sosa sira-nia produtu no hosi ida ne’e bele fó oportunidade ba sira-nia oan eskola.

Kona-ba legalidade, Ervinia Martins Brito dehan bainhira estabelese kurríkulu sira haree hotu ona rekizitu sira ne’ebé estabelese hosi Ajénsia Nasionál Avaliasaun no Akreditasaun Akadémika (ANAAA). Maske nune’e, seidauk rejista formál, maibé hala’o ona reuniaun informal ho ANAAA.

Notísia relevante : IPDC Planeia Loke Departamentu Ospitalidade No Turizmu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here