Imblema saúde. Imajen Google

DILI, 27 janeiru 2020 (TATOLI)—Membru Parlamentu Nasionál (PN) kestiona maka’as pasiente no kama iha Hospital Nacional Guido Valadares (HNGV) la balansu, tanba kama (pasiente nia toba fatin) oras ne’e hamutuk 350 de’it ne’ebé la korresponde ba númeru pasiente.

Deputadu Bankada Parlamentár FRETILIN, Fabião de Oliveira, hateten situasaun iha Hospital Nacional Guido Valadares, iha semana rua liubá pasiente sira barak maka toba iha rai.

Tuir nia, pasiente toba de’it iha rai iha opsitál nasionál ida hanesan HNGV ne’e hatudu ezemplu ladi’ak.

“Tuir dadus ne’ebé ha’u hetan, ita só iha kama hamutuk 350 maibé moras ne’e liuhosi ida-ne’e. Entaun, kerdizer, pasiente ho kama ne’ebé iha laiha balansu. Tan ne’e, halo nusá maka Governu bele buka meiu atubele rezolve problema sira ne’ebé mak akontese iha HNGV”, reprezentante povu ne’e kestiona asuntu ne’e liuhosi plenária Parlamentu Nasionál, segunda ne’e.

Nia hatutan, foin daudaun ne’e kama balun oferese hosi Klínika Bairru-Pité maibé ida-ne’e mós la to’o.

Nia husu Ministériu Saúde atu haree halo nusá maka rezolve kestaun pasiente sira-ne’ebé toba iha rai.

“Ida-ne’e importante tebes. Ne’e duni, husu ba Governu liuhosi Ministériu Saúde atu haree problema sira ne’ebé ke akontese iha HNGV para rezolve ho urjentemente”, Fabião fó hanoin.

Entretantu, Xefe Bankada Parlamentár Partidu Demokrátiku (PD), António da Conceição husu Governu tau atensaun sériu ba asuntu ne’e tanba presiza fó atendimentu ne’ebé dignu ba povu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here