Médiku Jerál, Lizete Vong Pereira, iha Aeroportu Internasionál Nicolau Lobato, ohin, ne’ebé informa kona-ba preparasaun atu kontrola coronavirus hosi pasajeiru sira hosi liur mai. Foto/Tatoli

DILI, 27 janeiru 2020 (TATOLI) – Médiku Jerál, Lizete Vong Pereira, afirma ekipa hosi Ministériu Saúde (MS) ne’ebé destakadu iha Aeroportu Internasionál Nicolau Lobato, prontu ona atu kontrola pasajeiru sira ne’ebé maka mai hosi li’ur, liuliu atu prevene coronavirus.

“Ita sei uza infrared thermometer hodi kontrola pasajeiru sira, ekipamentu ne’e ita uza atu haree sira-nia suhu temperature, sé ho 38 grau celcius, entaun ita sei haruka mai parte saúde nian hodi kontrola”, Lizete ba Ajénsia TATOLI, ohin.

Tanba ne’e, ekipa MS nia preparasaun ba daudaun ne’e maka fahe informasaun liuhosi pamfletu hodi tau iha pontu entrada atu pasajeiru sira bele asesu informasaun kona-ba coronavirus.

Nune’e mós, ekipa MS prepara ona health declaration atu pasajeiru sira prienxe iha aviaun laran, hafoin tun no entrega ba médiku sira iha pontu entrada, bainhira pasajeiru deskonfia ba coronavirus, ekipa sei haruka ba sala izolamentu ne’ebé maka prepara ona atu halo konsulta.

Notísia relevante : MS Koloka Ona Pesoál Saúde Sira Iha Fronteira, Aeroportu, Portu Asegura Virus Corona

“Ami halo ona health declaration, ida ne’e, suporta hosi ajénsia sira, atu distribui ba pasajeiru sira, nune’e sira bele prienxe iha aviaun laran hafoin tun mai depois entrega ba pesoál saúde ne’ebé preparadu iha pontu entrada”, dehan.

Hafoin ne’e, MS sei husu suporta hosi imigrasaun nian atu check fali pasajeiru hosi Xina ne’ebé karik afetadu hosi nia nasaun maka mai.

Nia salienta bainhira MS rona ona surtu hosi World Health Organization (WHO) konvoka kedas reuniaun ho multisetorál, hanesan Imigrasaun, Alfándega, Kuarentena inklui Ajénsia Air Timor, Sriwijaya, Citilink, Airnorth, hodi husu sira-nia opiniaun atubele prevene virus ne’e.

Nia espera katak meiu ne’ebé ekipa MS uza iha pontu entrada bele ajuda hodi coronavirus labele tama mai Timor-Leste.

Atualmente iha surtu kona-ba moras pneumonia ne’ebé maka kauza hosi virus, tipu foun hosi coronavirus ne’ebé maka relata ona hosi sidade Wuhan, Provínsia Hubei, Xina.

Coronavirus nu’udar família hosi virus respiratóriu ne’ebé maka bele kauza moras, hahú hosi inus-been baibain to’o moras sériu sira síndroma respiratóriu agudu grave (SARS).

Notísia relevante : Antesipa Virus Corona, Ministériu Kompetente Koopera Hodi Kontrola Sasán no Ema Tama-Sai iha Aeroportu

Jornalista : Zezito Silva

Editora : Maria Auxiliadora

PUBLISIDADEiklan

HAKEREK NO HATÁN

Please enter your comment!
Please enter your name here