Reuniaun entre lideransa Nasionál hosi Frente Revolucionária Timor-Leste Independente (FRETILIN) ho ninia estrutura sub-nasionál sira iha sede CCF, Fatuhada, domingu (26/01/2020). Imajen espesiál

DILI, 26 janeiru 2020 (TATOLI)—Lideransa Nasionál hosi Frente Revolucionária Timor-Leste Independente (FRETILIN) ho ninia estrutura sub-nasionál sira hala’o reuniaun ida hodi halo análize ba situasaun polítika atuál iha rai-laran.

Reuniaun ne’e hala’o iha sede Comité Central da FRETILIN (CCF), Fatuhada, Dili, loron 26 janeiru, ne’ebé hetan partisipasaun hosi lideransa nasionál FRETILIN, membru Komisaun Polítika Nasionál (CPN-sigla portugés), membru CCF no tékniku balun ne’ebé kolabora direta ho Sekretariadu Nasionál no estrutura FRETILIN husi munisípiu no postu administrativu sira hotu iha Timor-Leste.

Liuhusi komunikadu imprensa ne’ebé Agência TATOLI asesu, ohin, Sekretáriu Jerál FRETILIN, Marí Alkatiri hateten katak situasaun sira hanesan agora daudaun, importante maka atu hametin Estadu Direitu Demokrátiku no lejitimidade demokrátika.

“Bainhira ita harii Estadu Direitu Demokrátiku, ne’e signifika ita fó forsa ba lejitimidade demokrátika,” Marí afirma.

Sekretáriu Jerál FRETILIN ne’e hatutan, problema ne’ebé nasaun hasoru daudaun ne’e la’ós de’it problema ekonómika.

“Ita iha problema sosiál barak ne’ebé sobu tiha ita-nia sosiedade, ita-nia kultura, ita-nia valór no prinsípiu sira. Tanba ne’e duni papél importante agora maka atu harii filafali tesidu sosiál atubele fó sustentabilidade ba Timor-Leste ba oin,” nia subliña.

Lori opiniaun ho análize sira hosi baze, estrutura sub-nasionál FRETILIN nian reafirma depózita fiar no konfiansa tomak iha Sekretáriu Jerál FRETILIN, Marí Alkatiri, atu serbisu hamutuk ho Estadu no líder partidu polítiku sira seluk atu buka dalan ba situasaun polítika atuál.

Reuniaun ida-ne’e mós ho nia objetivu seluk halo análize ba pro no kontra ba posibilidade senáriu polítika balun ne’ebé sei bele mosu no papél saida mak FRETILIN bele hola.

Reuniaun ne’e konklui ho reafirma FRETILIN nia apoiu ba Prezidente Repúblika nia inisiativa no fó konfiansa tomak ba FRETILIN nia Sekretariu Jerál atu lidera prosesu tomak nune’e serbisu hamutuk ho entidade relevante sira hotu atu buka dalan solusiona situasaun ne’ebé Timor-Leste hasoru daudaun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here