Prezidente Comité Orientadora 25 (CO25) , Constâncio Pinto 'Terus'. Imajen TATOLI/Cipriano Colo

DILI, 25 janeiru 2020 (TATOLI)–Comité Orientadora 25 (CO25), preokupa ho situasaun polítika rai-laran no husu atu líder polítiku sira buka konsensu hodi hetan solusaun urjente, maibé la’ós ho dalan Eleisaun Antesipada (EA). 

Ho situasaun ne’e, maka komité rasik ho ninia inisiativa organiza diskusaun ida, envolve membru sira hotu husi komité rasik, konvida mós peritu lei ka jurista na’in-rua, hanesan Manuel Tilman ho Avelino Coelho, hodi fó mós sira-nia hanoin haree husi aspetu jurídiku.

Diskusaun aberta ne’e hala’o durante oras tolu iha sede Komité Orientadora 25, Vila Verde, Dili, ohin.

Prezidente Comité Orientadora 25 (CO25), Constâncio Pinto ‘Terus’ hateten, komité preokupa ho situasaun atuál no urjentemente presiza buka solusaun.

“Ami preokupa ho situasaun agora. Presiza hetan solusaun ida-ne’ebé maka urjente ba situasaun polítika ida-ne’e. Ohin ita konvida Jurista Manuel Tilman ho Avelino Coelho atu fó sira-nia perspetiva kona-ba situasaun ne’e, liga ho lei. Durante debate ne’e, mosu hanoin oioin husi Jurista Manuel Tilman ho Avelino Coelho kona-ba posibilidade atu hetan solusaun ba situasaun polítika”, nia haktuir.

Nia informa, durante diskusaun ne’e, Jurista Manuel Tilman dehan katak solusuan di’akliu maka eleisaun antesipada, maibé Jurista Avelino Coelho dehan katak iha alternativa lima…

Maibé, nia hatutan, jurista na’in-rua ne’e mós dehan katak Prezidente Repúblika mak sei tetu opsaun ida-ne’ebé mak di’ak atu solusiona impase polítika.

Tanba ne’e, komité sei tuur hamutuk filafali atu diskute didi’ak, halo analiza didi’ak ba hanoin hirak-ne’e, nune’e, bainhira karik komité hetan konvite husi Prezidente Repúblika, Francisco Guterres Lú Olo, komité mós bele hato’o ninia pozisaun ka ninia opiniaun.

“Durante diskusaun, membru komité hotu-hotu rejeita ho eleisaun antesipada, tanba razaun maka, primeiru, ita iha tan de’it maka tinan tolu atu ba eleisaun jerál. Segundu maka, ita presiza kria estabilidade ba ita-nia rai. Terseiru maka, bainhira ita ba eleisaun antesipada mós ninia rezultadu sei laiha diferensa ho rezultadu eleisaun antesipada iha tinan kotuk. Tanba ne’e maka ita presiza tempu ka períudu ida atu ita bele prepara an didi’ak nune’e bainhira ita ba eleisaun jerál ne’ebé besik ona, ita bele hetan rezultadu ida-ne’ebé di’ak. Karik halo koligasaun mós, koligasaun ida-ne’ebé di’ak ka partidu ida-ne’ebé mak manán mós, manán absoluta”, nia esplika.

Atu halo rezumu ba diskusaun ida-ne’e, Constâncio konklui katak komité preokupa no hakarak hetan lalais solusaun urjente tanba situasaun polítika ne’ebé iha, ninia impaktu boot ba ekonomia rai-laran.

“Ida maka, tenke fó nafatin mensajen pozitivu ba rai seluk, ba mundu, ba investór sira katak Timor estável nafatin, ne’ebé garante sira-nia konfiansa atu mai hodi investe nafatin. Komité rasik mós akompaña diálogu ne’ebé oras ne’e la’o hela ho entidade hotu, no iha esperansa katak desizaun hotu ne’ebé oras ne’e hotu-hotu tau konfiansa iha Prezidente Repúblika, sei hetan solusuan ida-ne’ebé di’ak ba ita-nia rai no povu ida-ne’e”, nia hakotu.

Comité Orientadora 25 (CO25), estabelese bazeia ba rezolusaun Governu númeru 1/2017, 9 janeiru 2017, ho nia mandatu atu halo peskiza no hakerek livru kona-ba luta Frente Urbana, Frente Klandestina partikulár-liu envolvimentu foin-sa’e no estudante-sira iha luta libertasaun nasionál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here