Agência Cable Beach Resort Husi Broome General Manager, Stuart Kentish (Loos) Intervista hela ho Traballdór Timor-Leste. Imajen/ Tatoli Egas Cristovão

DILI, 24 janeiru 2020 (TATOLI) – Diretór Nasionál Empregu Esteriór (DNEE) Sekretáriu Estadu Formasaun Profisionál no Empregu (SEFOPE), Filomeno Soares, informa rezultadu teste ba Programa Seasonal Worker ne’ebé rekruta hosi empreza Cable Beach Club Resort hosi Broome West Austrália, hamutuk traballadór na’in-10 maka liu.

“Maluk kandidatu traballadór sira ne’ebé foin daudaun hamutuk na’in-26 ne’ebé tuir teste entrevista iha Hotel Novo Turismo, hosi Austrália haruka ona rezultadu mai no ami simu husi rezultadu ne’e hatudu katak na’in-10 maka liu iha entrevista”, Filomeno informa ba TATOLI iha Becora, ohin.

Tanba ne’e, hosi rezultadu teste sei publika hosi parte DNEE iha tempu badak nia-laran, hodi nune’e kandidatu sira bele hatene sé maka liu no sé maka la liu.

Filomeno realsa katak prosesu ne’e transparente tanba diretamente hosi ekipa Austrália, liuliu empreza ne’ebé traballadór sira atu serbisu ba maka mai fó teste.

“Prosesu ne’e transparente tanba rezultadu ne’e ekipa sira lori bá Australia maka sira selesiona iha ne’ebá hafoin haruka nia rezultadu mai de’it”, dehan.

Entretantu, traballadór sira ne’e sei arranka iha tempu badak nia laran, maibé depende mós ba empreza kontaktu mai SEFOPE.

Iha 6 janeiru ne’e, Ajénsia Cable Beach Club Resort rekruta traballadór timoroan hamutuk 26 atu bá serbisu iha área ospitalidade nian,  nune’e husi númeru ne’e timoroan na’in-10 mak selesionadu.

Notísia relevante : Cable Beach Resort Rekruta Timoroan 26 Bá Serbisu iha Austrália iha Área Ospitalidade

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here