Diretora Programa Nasionál Dezenvolvimentu Suku (PNDS), Dulce Guterres Junior. Imajen Tatoli/Julia Chatarina

DILI, 23 janeiru 2020 (TATOLI)–Diretora Programa Nasionál Dezenvolvimentu Suku (PNDS), Dulce Guterres Junior, informa iha 2019 PNDS implementa projetu hamutuk 280 iha suku 202, maibé kansela projetu balun iha suku tolu.

“Kansela iha Suku Maluro, Postu Administrativu Viqueque, Munisípiu Viqueque, ho razaun tanba programa Liquefied Natural Gas (LNG) tama iha Beaço, entaun ita tenke kansela tanba komunidade sira labele halo projetu iha ne’ebá. Kansela mós iha suku rua seluk iha munisípiu balun tanba prioridade ne’ebé iha sira muda entaun la konsege halo projetu”, Diretora ne’e tenik ba Agência TATOLI iha nia knaar fatin, kinta ne’e.

Maski nune’e, nia dehan, husi projetu 280 ne’ebé implementa ona agora iha nasionál kuaze atinje ona pursentu 85 no daudaun ne’e hein prosesu inaugurasaun iha tinan ne’e.

“Projetu sira-ne’e depende ba alokasaun orsamentu ba kada suku, tanba Governu liuhosi Ministériu Administrasaun Estatál fó ba PNDS aloka ba kada suku ida pur-volta $40.000 to’o $70.000”, nia akresenta.

Tuir Diretora ne’e, suku sira uza osan depende ba dezeňu no Bill of Quantity (BOQ) ne’ebé mak iha ba suku ne’e no iha projetu balun ne’ebé mak uza osan $30.000, balun $18.000 no balun $20.000, maibé kuandu ho orsamentu $30.000 bele halo projetu boot ba suku laran.

“Tanba ne’e mak ha’u hanoin katak projetu infraestrutura bázika la’os ho osan boot liu. Ezemplu, iha Oé-Cusse ne’ebé mak iha irrigasaun boot tebes no sira halo ho orsamentu $40.000, agora atu finaliza ona”, nia subliňa.

Projetu Komunidade Mak Sai Na’in

Diretora Dulce esplika, projetu ne’ebé mak komunidade tenki sai na’in mak infraestrutura bázika hanesan halo estrada rurál, eskola, uma ba enfermeiru no doutór sira.

“Hanesan mós projetu sira mak fó retornu ekonomia ba komunidade no oinsá mak komunidade bele sai na’in ba projetu sira, entaun sira mós tenke kontribui maka’as atu ikus ne’e sira bele dehan katak ne’e la’ós Governu mak fó maibé na’in mak sira duni”, nia akresenta.

Nia hatutan, PNDS agora atu haree oinsá mak hafoin projetu ne’e ramata, komunidade iha ona grupu atu halo manutensaun ba operasaun ba projetu sira.

“Tanba ne’e mak ho infraestrutura bázika ne’ebé mak iha, PNDS iha hanoin ida katak labele dehan ne’e Governu nian maibé na’in mak komunidade. Tantu atu halo uma ba komunidade, halo fatin ba negósiu, komunidade tenke sai na’in. Tanba ne’e, sira tenke iha kontribuisaun atu ikus mai sira dehan ne’e ami-nian”, nia akresenta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here