Sekretáriu Jerál FRETILIN, Marí Alkatiri, dadalia ho jornalista sira hafoin nia ho kuadru FRETILIN sira hala'o soru-mutuk ho Xefe Estadu, Francisco Guterres Lú Olo, sesta (24/01/2020). Imajen Tatoli/Xisto Freitas

DILI, 24 janeiru 2020 (TATOLI)–Sekretáriu Jerál Partidu Frente Revolusionária Timor-Leste Independente (FRETILIN), Marí Bim Amude Alkatiri, defende eis Jenerál Taur Matan Ruak nu’udár Primeiru-Ministru (PM) VIII Governu Konstitusionál. 

Alkatiri hato’o asuntu ne’e, hafoin lidera kuadru partidu FRETILIN hodi hasoru malu ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, sesta ne’e.

“Normál, Taur sei Primeiru-Ministru. Ha’u laiha dúvida. Ha’u mós defende pozisaun eis Jenerál Taur Matan Ruak”, dehan eis Primeiru-Ministru ne’e.

Iha biban ne’e, nia mós esplika katak Governu jestaun bele funsiona ho kondisaun rua de’it.

“Governu jestaun atu la’o, Timor-Leste iha kondisaun rua de’it. Ida maka bainhira Governu ne’e hetan ona demisaun no ida tan maka bainhira eleisaun foun akontese, hafoin hein ba formasaun no pose ba Governu foun. Iha kazu ida-ne’e sei laiha eleisaun. Ita bele dehan iha entendimentu foun ida no forma Governu foun. Entaun, dentru desizaun Governu foun to’o toma pose, ne’e Governu jestaun bele la’o”, Alkatiri esplika.

Tanba ne’e, Alkatiri salienta, agora seidauk iha entendimentu foun no seidauk iha demisaun ba Xefe Governu atuál.

Antes ne’e, maski Orsamentu Jerál Estadu (OJE) 2020 la pasa iha Parlamentu Nasionál maibé PM Taur deklara katak, nia sei nafatin hanesan Primeiru-Ministru to’o iha ema maka troka ninia fatin.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here