Nakroma atraka iha realokasaun terminál ró iha Portu Dili. Imajen/Florencio Miranda Ximenes.

DILI, 24 janeiru 2020 (TATOLI) – Ministru Transporte no Komunikasaun, José Agostinho da Silva, hateten realokasaun terminál ró foun hahú funsiona hafoin Nakroma to’o Timor-Leste.

“Ohin, loron dahuluk ita-nia ró Nakroma fila husi Surabaya mai atraka iha portu foun no hahú funsiona ona ba ró pasajeiru sira seluk”, Ministru José Agostinho da Silva dehan hafoin observa direta Nakroma iha Portu Dili, ohin.

Realokasaun terminál ró urjente ne’e, inaugura husi Governu Timor-Leste ne’ebé reprezenta husi Ministru José Agostinho da Silva no Governu Japaun liuhusi Vise-Ministru Negósiu Estranjeiru no Asuntu Parlamentár Japaun, Norihiro Nakayama.

“Ita-nia portu ne’e ita inaugura ona, ne’ebé ita presiza uza no asegura infraestrutura ne’e ho di’ak atu uza kleur iha futuru”, katak.

Hodi dehan problema mak seidauk iha terminál ba pasajeiru sira atu utiliza bainhira halo viajen bá Oe-Cusse no Ataúro.

“Ita seidauk iha terminál ba pasajeiru atu ita-nia pasajeiru sira iha loron-manas no udan karik bele uza”, ministru adianta.

Governu liuhusi MTK prevee ona orsamentu millaun $1 iha Orsamentu Jerál Estadu (OJE) 2020 atu konstroe, maibé sumba hela iha Parlamentu Nasionál.

Eis Deputadu Bankada KHUNTO ne’e salienta orsamentu ne’ebé la pasa iha Parlamentu Nasionál ne’e klaru afeta ba planu konstrusaun terminál ne’e.

“Iha problema sempre iha solusaun, maibé presiza ita hotu nia espíritu no boa vantade atu kontribui hodi rezolve atu ita-nia pasajeiru sira bele hetan netik fatin ruma hafoin viajen”, nia espera.

Entretantu, Prezidente Konsellu Administrasaun Autoridade Portuária (APORTIL), Flávio Cardoso Neves, dehan presiza prepara fatin liuliu terminál, más osan seidauk iha, entaun APORTIL hahú hanoin atu halo fatin temporariu ida hodi fasilita pasajeiru sira.

Konstrusaun portu ne’e hanesan ponte kais ida ho naruk metru 100 no luan metru 20 ne’ebé bele akomoda ró pasajeiru rua durante oras 24 nia laran, asesu dalan (movable land platform) ho medida metru 55×52 ne’ebé kompleta ho ekipamentu nesesariu seluk hanesan iluminasaun, fornesimentu bee, enerjia, torneira hamate-ahi no ekipamentu ba seguransa.

Projetu refere hala’o hosi kontratór japonés Tobishima Corporation no superviziona hosi Japan Port Consultants, Ltd & ldes Inc., ho valór orsamentu kuaze Yen 2.197 (maizumenus millaun $21 ne’ebé Governu Japaun apoia) no Governu Timor-Leste mós aloka osan millaun $1,147.700. Durasaun konstrusaun hahú iha 6 jullu 2017 to’o 31 marsu 2019.

Notísia relevante : Nakroma Atraka Tiha ona iha Realokasaun Terminál Portu Dili

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here