Prezidente Interinu PLP, Abrão Freitas 'Mate Restu'. Imajen Tatoli/ Egas Cristóvão

DILI, 24 janeiru 2020 (TATOLI)–Partidu Libertasaun Populár (PLP), konsidera koligasaun Aliansa Mudansa ba Progresu (AMP), la eziste ona tanba deputadu sira husi partidu Congresso Nacional de Reconstrução de Timor (CNRT) ne’ebé hanesan mós aliadu ba AMP la vota a-favór ba Orsamentu Jerál Estadu (OJE) 2020.

“Husi inísiu ita deside iha buat tolu mak fundamentál tebes. Ida maka partidu tolu ne’ebé halo aliadu iha Parlamentu Nasionál garante vota a-favór ba programa ne’ebé mai husi Governu. Segundu, vota a-favór ba Orsamentu Jerál Estadu (OJE). Terseiru, vota a-favór ba lei estruturante sira. Ita-boot sira akompaña, iha tinan 2018, 2019, OJE hetan aprovasaun iha Parlamentu Nasionál (PN). Maibé, foin lalais ne’e, OJE 2020 xumba tiha”, Primeiru Vise-Prezidente PLP, Abrão Freitas ‘Mate Restu’, hanesan mós atuál Prezidente PLP Interinu ko’alia asuntu ne’e, hafoin lidera kuadru PLP hasoru-malu ho Prezidente Repúblika iha Palásiu Prezidente Nicolau Lobato, Bairru Pité, Dili, ohin.

Lee mós: Kalbuadi: Inezisténsia AMP Tenke Liuhusi Konferénsia

Nia dehan, ho baze fundamentál ida-ne’e maka halo AMP metin. Maibé, realidade hatudu katak foin lalais ne’e deputadu sira husi CNRT mak vota abstensaun ba OJE.

“Tanba ne’e maka pozisaun PLP entrega filafali ba Prezidente Repúblika. Saida de’it mak Prezidente deside, PLP apoiu”, Mate Restu subliña.

Deklarasaun ne’e, hodi responde pergunta kona-ba deklarasaun CNRT dehan katak inezisténsia AMP tenke liuhusi konferénsia.

Nia informa katak, iha tempu badak, Prezidente Repúblika sei konvoka diálogu hanesan ho órgaun konsultativu sira, líder partidu politiku sira, liuliu líder nasionál sira hahú husi Kay Rala Xanana Gusmão, José Ramos Horta, Marí Alkatiri no sira seluk tan.

“Hau fi’ar katak iha tempu badak sira sei hasoru-malu ho Prezidente Repúblika. Sira sei buka solusaun ida-ne’ebé di’ak no justu ba Timor-Leste tomak”, nia hateten.

Líder PLP ne’ebé hala’o enkontru ho Prezidente Repúblika lidera husi Primeiru Vise-Prezidente PLP, Abrão Freitas ‘Mate Restu’, Segundu Vise-Prezidente,  María Angelina Lopez Sarmento, Kintu Vise-Prezidente PLP, Abel Pires, Vise-Prezidente Komisaun Jurídika PLP, Merita Correia, Vise-Prezidente Comissão Política Nasionál (CPN), Francisco de Vasconcelos.

Proposta Orsamentu Jerál Estadu 2020 (OJE) la pasa iha jeneralidade iha plenária Parlamentu Nasionál, iha 17 janeiru 2020. Rezultadu votasaun hatudu vota a-favór 13, kontra 15 no abstensaun 25.

Entretantu, koligasaun AMP kompostu husi partidu CNRT, PLP no KHUNTO, asina akordu koligasaun nu’udár pakote úniku iha loron 1 fevereiru 2018 molok Eleisaun Antesipada (EA).

Iha loron 22 fevereiru 2018, partidu tolu ne’e hala’o konferénsia idak-idak no iha tuku 15.00 halo konferénsia hodi hamosu deklarasaun konjunta ba koligasaun, iha Centro Convencões Dili.

Iha loron 22 juñu 2018, Prezidente Repúblika, Francisco Guterres Lú Olo fó pose ba membru VIII Governu Konstitusionál, lidera husi Primeiru-Ministru, Taur Matan Ruak, iha salaun Nobre Lahane.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here