Adjuntu Sekretáriu Jerál Partidu Kmanek Haburas Unidade Nasionál Timór-oan (KHUNTO), Luís Roberto

DILI, 24 janeiru 2020 (TATOLI) – Adjuntu Sekretáriu Jerál Partidu Kmanek Haburas Unidade Nasionál Timór-oan (KHUNTO), Luís Roberto, hateten KHUNTO prontu sai opozisaun, maibé importante maka líder nasionál bele tur hamutuk hodi bele solusiona inserteza polítika.

“Karik aban bainrua maka forma Governu foun maka KHUNTO filafali ba opozisaun, KHUNTO sempre prontu de’it tanba opozisaun mós sai opozisaun ba ita-nia rai-laran hodi bele dezenvolve ita-nia rai”, nia dehan ba Agência TATOLI, sesta ne’e.

Tuir nia, pozisaun saida de’it maka partidu foun ne’e sei asume, importante mak tau interese nasionál nia aas liu buat hotu.

“Ha’u fiar katak, opozisaun la’ós atu kontra nasaun. Ne’ebé atu opozisaun ka atu envolve iha Governu, naran katak ita hotu-hotu bele kuda interese nasionál iha fuan hodi hadi’a dezenvolvimentu rai-laran. Ne’e maka importante liu”, nia akresenta.

Atuál Segundu Vise-Prezidente PN, Luis Roberto ne’e hateten, partidu ne’e hala’o ona enkontru internál partidu entre lideransa sira hotu-hotu kona-ba situasaun atuál no agora KHUNTO hein de’it desizaun hosi Prezidente Repúblika.

“Preferénsia KHUNTO nian atu solusiona situasaun atuál maka ita-nia Prezidente Repúblika hamutuk ho ita-nia aman ba nasaun sira hotu-hotu, hodi tur hamutuk nune’e bele hakotu impase polítika ida-ne’e”, nia subliňa.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here