Sekretáriu Jerál FRETILIN, Marí Alkatiri, dadalia ho jornalista sira hafoin nia ho kuadru FRETILIN sira hala'o soru-mutuk ho Xefe Estadu, Francisco Guterres Lú Olo, sesta (24/01/2020). Imajen Tatoli/Xisto Freitas

DILI, 24 janeiru 2020 (TATOLI)–Sekretáriu Jerál Partidu Frente Revolusionária Timor-Leste Independente (FRETILIN), Marí Bim Amude Alkatiri, hateten FRETILIN lakohi Eleisaun Antesipada (EA) tanba povu kolen ona. 

Marí hato’o asuntu ne’e, hafoin lidera kuadru partidu FRETILIN, hasoru-malu ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“FRETILIN prontu ba buat hotu maibé lakohi Eleisaun Antesipada. FRETILIN lakohi atu mandatu Prezidente Repúblika nian ida, iha tinan lima, halo kedas Eleisaun Antesipada dala rua iha tinan rua. Povu mós kolen ona ho Eleisaun Antesipada”, Marí esplika.

Líder istóriku ne’e lakohi atu fó sai opiniaun ne’ebé kuadru sira hato’o ba Prezidente Repúblika tanba, tuir nia, prosesu ne’e foin hahú. Tanba ne’e, nia hakarak atu husik entrega lai ba Prezidente Repúblika atu refleta opiniaun ne’e.

Nia mós fiar katak Prezidente Repúblika Lú Olo sei foti desizaun, hafoin rona uluk ona partidu polítiku sira, depois tenke haree ba lei, ba Konstituisaun RDTL.

Sekretáriu Jerál ne’e haklaken, maski opiniaun ne’ebé hato’o ba Xefe Estadu ne’e konfidensiál, maibé FRETILIN sempre hanoin di’ak ba povu no sempre preokupa ho povu nia moris.

“FRETILIN uluk kedas dehan liberta povu no liberta pátria. Tanba ne’e, FRETILIN sempre hanoin nafatin prinsípiu ida-ne’e, liuliu hakarak hasai povu husi ki’ak, mukit no nakukun”, Marí Alkatiri subliña.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here