Francisco Belo

DILI, 24 janeiru 2020 (TATOLI)-Prezidente eleitu TLPU (Timor-Leste Press Union), Manuel Pinto hamutuk ho nia estrutura, ohin, simu pose, iha salaun Ministériu Saúde, Palácio das Cinzas, Caicoli.

Prezidente sesante TLPU, Francisco Simões da Costa Belo hato’o mensajen  ba prezidente eleitu ba périodu 2020-2024, Manuel Pinto ho estrutura tomak atu iha mandatu kontinua defende interrese membru sira nian.

“Serbisu todan no dezafiu ba oin sei iha liuliu oinsá fó advokasia no fó kapasitasaun ba membru no organizasaun rasik. Kontinua investe iha programa ne’e atu nune’e bele asegurra, fó duni mahan ba ita-nia membru sira (TLPU) ba oin,” Prezidente sesante, Francisco Simões, hateten iha nia diskursu.

“Espera katak estrutura sei halo buat ruma,” eis-ezekutivu TLPU ne’e espera tan.

Iha fatin hanesan, Prezidente TLPU, Manuel Pinto, husu nafatin partisipasaun másima husi inisiadór no membru sira hotu, hodi hamutuk konsolidade TLPU iha nível nasionál, hodi projeta mós ba nível internasionál.

“Ita hotu nia partisipasaun esensiál. Ita tenke konsidera nafatin katak TLPU ne’e ita nian no ita mak sei haboot nia,” Prezidente TLPU hateten, iha nia diskursu.

Nia reforsa, estrutura TLPU iha périodu 2020-2024 ne’e mai kontinua buat ne’ebé mak inisiadór hahú no mehi ona antes ne’e. “Ami mai nu’udar kontinuasaun husi serbisu ne’ebé mak inisiadór no estrutura sira ne’ebé iha no halo ona hodi evolui hanesan mós hanesan organizisaun seluk iha mundu”.

“Maibé ida ne’e la fasil. Presiza ita-nia vontade hodi determina. Vontade kuandu zero ne’e susar. Ita tenke komunga prinsipiu ida hodi defende liberdade imprensa no espresaun,” ezekutivu TLPU salienta.

Entretantu, iha serimónia tomada pose ne’e estrutura sesante liuhusi nia prezidente, Francisco Simões da Costa Belo entrega bandeira TLPU ba prezidente eleitu, Manuel Pinto ho nia estrutura, perante membru no konvidadu espesiál sira hanesan Prezidente TATOLI, IP, José da Costa, Prezidente RTTL, EP, Francisco Gari, reprezentante Sekretáriu Estadu Komunikasaun Sosiál, Xefe Gabinete Julião Gonçalves, reprezentante KI (Konsellu Imprensa), inklui reprezentante media sira.

Notísia relevante:Manuel Pinto, Prezidente TLPU 2020-2024

Jornalista: Felicidade Ximenes

Editór    : Rafy Belo

HAKEREK NO HATÁN

Please enter your comment!
Please enter your name here