Reitór ISC, Sebastião Pereira. Imajen: Nelia Fernandes

DILI, 24 janeiru 2020 (TATOLI)-Reitór Institutu Superiór Cristal (ISC), Sebastião Pereira hateten, estudante finalista balun husi ISC tinan ida ne’e adia sira nia prosesu estajiu tanba osan laiha atu selu dosente orientadór sira ne’ebé atu halo akompañamentu ba sira.

“Asuntu ida ne’e sai preokupasaun Fundasaun nian hodi buka alternativu. Antes ne’e laiha problema ho estajiariu sira maske estudante sira barak mak moris husi familia ne’ebé dependénsia ba toos no natar. Tinan ida ne’e, estudante balun hasoru difikuldade tanba familia laiha osan atu selu sira-nia eskola iha prosesu estajiu nian,” dehan Sebastião Pereira ba  Ajênsia Tatoli iha nia knar fatin, Balide, kuarta (23/1/2020).

Tanba, tuir nia, Institutu Superior Cristal (ISC) nu’udar institutu superiór privadu ida ne’ebé laiha ninia orsamentu rasik. Nia dehan, buat hotu dependénsia mós ba estudante sira entaun ISC labele halo buat barak.

“Ita halo mós esforsu oinsá atu hetan dalan hodi rezolve problema ne’ebé estudante sira infrenta. Foin lalais, ita halo aprosimasaun ho Ministériu Solidariedade Sosiál liuhusi dirasaun ne’ebé apoiu bolsa da mae ba estudante sira maibé rezultadu osan laiha,” nia infroma.

Nu’udar reitór, nia haktuir, nia sente tristi tanba estudante estajiariu sira barak mak trava prosesu estajiu ba tinan oin ho razaun osan iha mak sira kontinua estajiu.

Nia dehan, prosesu estajiu ne’e mak rigoroza oituan kuandu osan laiha oinsá mak sira bele halo estajiu pratika iha klinika, pratika komunitaria, pratika saúde mental, no pratika pedagozia ne’e difisil. Tanba, nia dehan, tenke selu uluk mak foin halo pratika.

“Problema esudante estajiariu sira-nian hahú bolu atensaun ba Konsellu Superiór Akademiku ISC, atu tau ona atensaun ba asuntu ka problema ne’e,” nia esplika.

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here