Diretora Programa Nasionál Dezenvolvimentu Suku (PNDS), Dulce Guterres Junior. Imajen Tatoli/Julia Chatarina

DILI, 23 janeiru 2020 (TATOLI)–Diretora Programa Nasionál Dezenvolvimentu Suku (PNDS), Dulce Guterres Junior, informa iha tinan 2020 PNDS sei halo serbisu barak tanba hanesan kontinuasaun hosi projetu sira ne’ebé hala’o iha 2019 nian, liuliu ba suku 202 ne’ebé mak balun seidauk finaliza.

“Iha 2020 ami só bele implementa iha faze rua ba síklu tolu nian, pur-volta suku 117 ne’ebé atu implementa ho osan duodésimu ne’ebé mak iha”, nia tenik ba Agência TATOLI iha ninia knaar fatin, Dili, kinta ne’e.

Nia dehan, maski daudaun ne’e uza rejime duodésimu maibé PNDS kontinua ho atividade sira ne’ebé iha tanba ho orsamentu duodésimu ne’ebé mantein hela ba kada fulan.

Diretora ne’e informa, ba tinan 2020 PNDS uza orsamentu duodésimu ne’ebé alokadu iha 2019 pur-volta millaun $9,3 no sei kontinua aloka ba kada fulan ho montante $790.000 ne’ebé mak tenke transfere ba suku sira.

“Iha área hirak-ne’e ami kontinua la’o ho prioridade ne’ebé mak komunidade sira hato’o ona, liuliu iha área bee-moos, estrada rurál, hadi’a sala eskola nian, klínika no mós irrigasaun ki’ikoan sira, maibé área importante liu mak ba bee-moos”, nia esplika.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here