Edifisiu Tribunál Distritál Dili. Imajen/TATOLI

DILI, 23 janeiru 2020 (TATOLI) – Tribunal Distritál Dili (TDD) hala’o primeiru interrogatóriu ba arguido TS ne’ebé deskonfia komete krime falsifika dokumentu ho notasaun téknika ne’ebé previstu iha artigu 207 no 305 husi Kódigu Penal Timor-Leste.

Arguido TC hanesan membru Polisia Sientífiku Investigasaun Kriminál (PSIK). Iha loron 02 fulan fevereiru 2018, arguido tuir ona ezame  ba iha entrevista atu hetan Karta Kondusaun no pasa tiha ona, maibé arguido seidauk tuir ezame pratika.

Iha loron 12 fevereiru 2018, testemuña MG ba iha servisu fatin atu hala’o servisu hanesan limpezador. Iha momentu ne’ebá, arguido tula nia kolega JR kondús karreta hale’u edifísiu, no soke testemuña too monu ba rai.

Kona-ba prosesu neglijente ne’e dame malu no taka tiha ona prosesu nee.

Iha parte seluk, investigasaun sei lao hela no MP notifika arguido halo interrogatóriu no arguido rasik entrega dokumentu ne’ebé nia rasik riska katak nia pasa iha ezame pratika sem data.

Konfirma ba iha DNTT katak, arguido seidauk tuir ezame pratika.
Arguido hanesan autór material ba krime kondusaun sem karta, no falsifika dokumentu ka notasaun téknika ne’ebé previstu iha artigu 207 no 305 husi KP.

Hatán ba faktu nee arguido deklara katak, balu loos no balu laloos. Tanba tuir  nia tiha ona ezame entrevista, maibé seidauk tuir ezame pratika, no dokumentu ne’ebé nia simu husi DNTT iha kedan ona riska iha okos katak, passa ona iha pratika.

“Laos ha’u maka riska dehan passa nee, maibé h’au simu dokumentu iha nanis ona, ” deklara arguido iha sala julgamentu, ohin.

Arguido deklara katak, momentu ne’ebá nia la iha karta kondusaun duni, maibé antes nee nia treinu ona lori karreta, tanba nee maka momentu ne’ebá nia mós koko lori karreta.

Rona tiha arguido, tribunal adia julgamentu ba iha loron 07 fulan fevereiru 2020, tuku 16:00 Otl, hodi kontinua rona sasin.
Audiénsia julgamentu nee prezide husi juiz koletiva, Edite Palmira, Ivan Suritay, Juiz estaziada Patricia de Fatima, Ministériu Públiku reprezenta husi Prokuradór Hernani Rangel, arguido hetan asisténsia lega husi Defensor Públiku.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here