Prezidente MOKATIL, Hélio Dias da Silva. Foto TATOLI: Rafy Belo

DILI, 23 janeiru 2020 (TATOLI) – Prezidente Movimentu Kamponeza Timor-Leste (MOKATIL), Hélio Dias da Silva, hateten produsaun ba batar ain-naruk (sorghum) sei deside iha asembleia MOKATIL.

“Ha’u hanoin, produsaun batar ain-naruk nian, ida ne’e ami sei ko’alia iha asembleia traballu MOKATIL ne’ebé sei realiza iha fulan-fevereiru”, nia dehan ba TATOLI iha Mandarin, kuarta ne’e.

Nia akresenta asembleia traballu MOKATIL sei diskute kle’an liu kona-ba produsaun batar ain-naruk, atu bá oin halo oinsá, define presu batar ain-naruk, nune’e ko’alia kle’an tuir estatutu MOKATIL, inklui ko’alia mós rai-na’in ne’ebé sei hetan porsentu 10 bainhira halo produsaun.

“Ami sei ko’alia ida ne’e hamutuk ho membru komité baze MOKATIL nian, tanba desizaun ne’e labele deside ema ida ka rua, maibé deside iha asembleia, nune’e bele fó benefísiu ba ita-nia abitante sira ne’ebé prodús no hola batar ain-naruk ne’e rasik”, afirma.

Nia haktuir antes ne’e, Sekretáriu Estadu Kooperativa (SEKoop), Arsénio Pereira da Silva, entrega ona mákina prosesamentu sorghum ka batar ain-naruk hamutuk unidade 152 ba MOKATIL atu hahú halo prosesamentu ba produsaun sorghum.

Notísia relevante : SEKoop Entrega Mákina Prosesamentu Sorghum Unidade 152 ba MOKATIL

“Tinan kotuk ita foka ba fini, tinan ne’e, klaru katak oinsá halo produsaun tanba ne’e presiza diskusaun kle’an”, dehan.

Antes ne’e, líder nasionál Kay Rala Xanana Gusmão ho parte Governu liuhosi SEKoop, ofisialmente halo lansamentu nasionál dahuluk ba sorghum hamutuk ektare lima iha suku Guiço, Postu Administrativu Maubara, Munisípiu Liquiça.

Notísia relevante : Xanana-Governu Halo Lansamentu Nasionál ba Kolleita Sorghum Ektare 38

SEKoop hanoin katak volume atu fornese ba merenda eskolár to’o tanba kada ektare ida ba batar Kay Rala ne’e rata-rata tonelada 2.5

Notísia relevante : To’os-Na’in Espera Sorghum Folin Iha Merkadu

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here