Diretora Programa Nasionál Dezenvolvimentu Suku (PNDS), Dulce Guterres Junior. Imajen Tatoli/Julia Chatarina

DILI, 23 janeiru 2020 (TATOLI)–Diretora Programa Nasionál Dezenvolvimentu Suku (PNDS), Dulce Guterres Junior, informa PNDS iha tinan 2020 hakarak haree liubá programa ne’ebé bele fó rendimentu ba komunidade.

“Agora daudaun ami iha diskusaun hela atu implementa programa liuliu iha retornu ekonomia. Agora ekipa PNDS halo hela estudu viabilidade no haree fatin ne’ebé atu implementa programa ida-ne’e”, Diretora ne’e tanik ba Agência TATOLI iha nia knaar fatin, kinta ne’e.

Tanba ne’e, nia dehan, aleinde haree ba programa infraestrutura bázika, PNDS mós hakarak halo atividade sira ne’ebé hetan retornu no identifika fatin potensiál balun atu halo fatin ba ema atu halo negósiu no mós ba maluk ne’ebé fa’an sasán iha estrada ninin.

Nune’e mós, Diretora akresenta,  ba mós parte balun ne’ebé halai iha suku área rurál ne’ebé iha poténsia ema vizita beibeik maibé sira laiha fatin atu toba no han iha refere.

“PNDS haree ida-ne’e atu kria kondisaun ruma atubele hadi’a sira-nia moris iha suku sira ne’ebé mak presiza liu atu hadi’a sira-ninia ekonomia”, nia salienta.

Dulce subliña, tinan ida-ne’e sei depende ba menu indikativu ne’ebé mak iha no sei PNDS mak atu hala’o atividade ne’ebé indika ona.

“Ami sei hahú atu hala’o treinamentu ba komunidade bainhira atu hala’o atividade atu hetan retornu báziku. Komunidade tenke hetan treinamentu bázika atu jere sira-nia infraestrutura ne’ebé iha ona”, nia esklarese.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here