Prezidente Parlamentu Nasionál, Arão Noé de Jesus da Costa Amaral, prezide reuniaun líder bankada, iha sala konferénsia Parlamentu Nasionál. Imajen dok. Tatoli

DILI, 23 janeiru 2020 (TATOLI)—Ohin, líder bankada sira sei diskute asuntu tolu, hanesan Konta Jerál Estadu 2018 nian, diskusaun ba Segunda Alterasaun Lei Fundu Petrolíferu no votu solidariedade ba povu Australianu.

Bainhira ajenda ne’e hetan aprovasaun hosi líder bankada sira sei lori ba plenária iha segunda no tersa, semana oin.

“Ohin, enkontru líder bankada sira, ho ajenda tolu ne’ebé Prezidente Parlamentu Nasionál propoin ona. Ida maka atu halo apresiasaun kona-ba Konta Jerál Estadu (KJE) ba tinan 2018 nian, segundu atu deside diskusaun kona-ba Lei Fundu Petrolíferu no mós iha hanoin fó votu solidariedade ba povu Australianu ne’ebé hasoru inséndiu”, Vise-Prezidente Parlamentu Nasionál, Maria Angelina Lopez Sarmento ba jornalista sira molok reuniaun líder bankada sira, iha resintu Parlamentu Nasionál, kinta ne’e.

“Ajenda ida maka atu oinsá líder bankada sira deside sá loron maka halo ajendamentu ba diskusaun kona-ba Lei Fundu Petrolíferu ne’ebé sei iha segunda alterasaun ho asuntu sira seluk”, nia tenik.

Maria Angelina hatutan Parlamentu Nasionál iha mós hanoin fó votu solidariedade ba povu Australianu tanba foin daudaun hasoru inséndiu ne’ebé boot tebes.

“Tolu ne’e mak sei sai ajenda. Karik iha tan asuntu diversu, orsida ami sei divulga fali ba ita-boot sira no rezultadu hosi asuntu tolu ne’e hotu”, nia haklaken.

Tuir observasaun Agência TATOLI nian, reuniaun líder bankada ne’e lidera hosi Prezidente Parlamentu Nasionál, Arão Noé de Jesus da Costa Amaral no Vise-Prezidente Parlamentu Nasionál, Maria Angelina Sarmento.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here