Portu Tibar.Imajen/TATOLI

DILI, 23 janeiru 2020 (TATOLI)–Diretór Ezekutivu Timor Port S.A, Rafael Ribeiro, informa projetu konstrusaun Portu Baía Tibar ne’ebé tuir planu sei ramata iha tinan oin, daudaun ne’e la’o hela.

“Totál atividade ne’ebé hala’o iha Portu Tibar maizumenus atinje ona pursentu 20. Bá-oin sei halo rai metin liután no fulan tolu tan sei baku ponte kais nia riin sira”, nia tenik ba Agência TATOLI iha ninia knaar fatin, Bairro Formosa, Dili, kinta ne’e.

Notísia Relavante: Governu Entrega Sertifikadu Investidór Ba Timor Port S.A Ba Konstrusaun Portu Tibar

Tuir Diretór ne’e, daudaun ne’e finaliza ona reklamasaun ba parte hotu no agora hatama hela fatuk ba rai ne’ebé ateru ona.

Nia afirma, durante konstrusaun portu, seidauk iha impedimentu ruma ne’ebé mak konsidera bele halo paradu obra ne’e.

“Ba konstrusaun sira-ne’e problema laiha no buat hotu la’o ho di’ak. Iha estimasaun finaliza obra refere iha 21 agostu 2021 maibé bele mós tarde uitoan”, nia akresenta.

Rafael dehan, maski ho situasaun polítika ne’ebé daudaun ne’e la’o hela tanba orsamentu la pasa, maibé kontrusaun kontinua la’o nafatin tanba kompaňia iha ona planu.

“Projetu kontinua la’o nafatin hanesan baibain. Ligasaun ho Governu la’o di’ak nafatin no Governu fó apoiu nafatin ba atividade ida-ne’e”, nia dehan tan.

Nia haklaken, ba konstrusaun ne’e etapa tuir mai maka sei halo rai metin liután no tempu besik sei baku ponte kais nia ai-riin sira ba tasi okos atu bele hahú ona konstrusaun.

Konstrusaun Hahú Iha 2018

Iha loron 30 agostu 2018, Primeiru-Ministru (PM), Taur Matan Ruak halo lansamentu ba konstrusaun Portu Tibar, ne’ebé tuir planu loron konstrusaun hahú husi loron lansamentu no sei ramata iha 30 agostu 2021.

Konstrusaun Portu Tibar, lokaliza iha kilómetru 10 hosi Oeste Dili, iha Baía Tibar, Munisípiu Liquiçá, hanesan infraestrutura prioritária ne’ebé identifika ona iha Planu Estratéjiku Dezenvolvimentu (PED) 2011-2030.

Projetu ho durasaun serbisu tinan tolu ne’e, hanesan konstrusaun nível internasionál, ne’ebé ezekuta liuhosi Timor Port S.A. ho modalidade Parseria Públika Privada (PPP) entre konsórsiu Bolloré no Governu Timor-Leste.

Ba konstrusaun ne’e, Governu aloka millaun $130, enkuantu Timor Port no Bolloré hamutuk miliaun $140, totál millaun $270 ba faze inísiu. Totál investimentu orsamentu ba Portu Tibar to’o tinan 30 ho valór millaun $500.

Liuhosi konkursu internasionál, Governu selesiona Bolloré Group (Parseiru Privadu) atu dezenvolve portu foun (green field port) ho modelu dezeñu, harii, ko-finansia, opera no transfere (Design Build Finance Operate & Transfer/DBFOT).

Bolloré Group nu’udar kompañia Francês koñesidu iha nível mundiál espesializada iha konsensaun portu no lojístika, no agora daudaun opera terminál kontentór hamutuk 16 iha nasaun oioin.

Atu hala’o dezenvolvimentu portu, Governu asina kontratu ho Timor Port S.A. (kompañia ne’ebé registradu iha Timor-Leste no na’in husi Bolloré Group) iha loron 3 juñu 2016 ba konsensaun tinan 30 nian, hafoin períodu konsensaun, Timor-Port S.A. sei transfere fali portu internasionál ne’e (Portu Tibar) ba Governu Timor-Leste.

Tuir kontratu ho Governu, Timor Port S.A. bele halo sub-kontratu independentemente ba serbisu konstrusaun no operasaun ba entidade seluk no asegura entidade ne’ebé envolve hodi kumpre ho espesifikasaun téknika referida iha Kontratu Konsensaun.

Nune’e, konsesionária lansa independentemente konkursu internasionál no konklui tiha ona konkursu ne’e ho kompañia selesionadu China Harbour Engineering Company (CHEC) nu’udar parte ne’ebé manán ba konstrusaun ba Portu Tibar iha loron iha 12 dezembru 2017.

Parte Governu estabelese ona Unidade Jestaun Portu Baía Tibar hodi dedika totalmente ba implementasaun projetu ne’e, ho profisionál sira ne’ebé iha esperiénsia ona, tantu nasionál no internasionál, ne’ebé kombina ho koñesimentu nesesáriu hodi jere akordu Kontratu Konsensaun durante faze konstrusaun (téknika, seguransa, saúde no ambiente no legál).

Previstu kais rua ho metru 630, bele simu kontentór 8700.000 iha tinan ida nia laran.

Aleinde ne’e, durante faze konstrusaun, iha projesaun katak sei kria empregu ba ema na’in-500 ne’ebé maioria ba timoroan, nu’udar kompromisu husi konsensionária.

Hetan Prémiu Mellór Projetu 2018 Iha Rejiaun Ázia Pasífiku

IJ Globál fó prémiu “Mellór Projetu iha Tinan 2018” iha Rejiaun Ázia Pasífiku, ba Parseria Públika Privada (PPP) Portu Tibar iha Timor-Leste.

IJ Globál hanesan organizasaun líder mundiál iha infraestrutura no finansiamentu projetu no prémiu ne’e anúnsia iha loron 28 marsu 2019 iha Singapura.

Projetu Portu Tibar ne’e selesionadu entre projetu PPP ne’ebé realizadu iha país dezenvolvidu hotu iha Rejiaun Ázia Pasífiku.

Rekoñesimentu internasionál ne’e hanesan  dahuluk ba PPP ne’ebé dezenvolve iha Timor-Leste no nu’udar konkista boot ba Governu Timor-Leste. Nune’e mós hatudu dalan ba dezenvolvimentu husi projetu PPP ne’ebé fó rezultadu di’ak.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here