Ministra Solidariedade Sosiál no Inkluzaun, Armanda Berta dos Santos. Imajen/Egas Cristovão

DILI, 23 janeiru 2020 (TATOLI)–Durante enkontru ho Prezidente Repúblika (PR), Francisco Guterres Lú Olo, líder sira husi Partidu Kmanek Haburas Unidade Nasionál Timor Oan (KHUNTO) aprezenta asuntu rua. 

Prezidente KHUNTO, Armanda Berta dos Santos esplika, buat rua ne’ebé KHUNTO aprezenta ba Prezidente Repúblika mak hanesan, husu Xefe Estadu hanesan aman-nasaun atu halibur líder sira hotu, liuliu líder másimu órgaun soberania sira, inklui líder nasionál sira, atu tuur hamutuk halo diálogu, para buka solusaun ba situasaun polítika rai-laran.

Segundu, nia hatutan, KHUNTO hakarak atu entrega oportunidade ba Prezidente Repúblika hodi uza ninia kompeténsia tuir Konstituisaun Repúblika Demokrátika Timor-Leste (KRDTL) artigu 86 alínea f.

“Iha buat rua mak KHUNTO aprezenta. Primeiru maka husu aman nasaun sira hamutuk, atu bele buka solusuan ba situasaun atuál. Segundu, tuir Konstituisaun RTL artigu 86 alínea f fó tempu ba Prezidente Repúblika atu uza ninia kompétensia atu foti desizaun”, Armanda fó-sai ba mídia, iha Palásiu Prezidente Nicolau Lobato, Bairru Pité, Dili, ohin.

Ho asuntu rua ne’ebé aprezenta, KHUNTO fiar katak Prezidente Repúblika sei foti desizaun ne’ebé justu ba situasaun atuál.

“Buat sira-ne’e hotu KHUNTO fiar desizaun ikus husi Prezidente Repúblika, no saida de’it mak deside husi PR, KHUNTO sei fó apoiu másimu”, nia deklara.

Kona-ba deklarasaun Primeiru-Ministru (PM), Taur Matan Ruak ba inezisténsia AMP hafoin Orsamentu Jerál Estadu (OJE) 2020 xumba iha Parlamentu Nasionál, Armanda hateten, AMP ninia portavóz mak PM Taur, nune’e, desizaun saida deit mak portavóz ko’alia ona, KHUNTO labele ko’alia tan.

“Ida-ne’e ha’u labele hakat ba iha ne’ebá, tanba AMP ninia portavóz mak PM rasik. Tanba ne’e, saida mak PM Taur deklara, KHUNTO labele hakat to’o iha ne’ebá”, atuál Ministra Solidariedade Sosiál no Inkluzaun ne’e hatutan.

Enkontru Ho Xefe Estadu, Armanda Berta dos Santos akompañadu husi kuadru sira mak hanesan José Agostinho, António Maria Nobre Amaral Tilman no Luís Roberto.

Konstituisaun RDTL artigu 86 (Prezidente Repúblika nia knaar kona-ba órgaun seluk) iha alínea f hateten; Hakotu Parlamentu Nasionál iha kazu krize boot institusionál nian, ne’ebé labele iha formasaun Governu ka aprovasaun Orsamentu Jerál Estadu nian, iha tempu naruk liu loron neen-nulu, bainhira rona tiha ona partidu polítiku sira ne’ebé hetan kadeira iha Parlamentu Nasionál, no rona Konsellu Estadu, iha tempu ne’ebé la iha kdasar jurídiku atu hala’o disolusaun, tenke haree tuir regra iha artigu 100.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here