Ministru Interior Interinu, Filomeno da Paixão de Jesus, kaer-liman ho Diretór The International Law Enforcement Academy, Andre Cunnej . Imajen/MI

DILI, 23 janeiru 2020 (TATOLI)- The International Law Enforcement Academy (ILEA) husi Estadu Unidu Amerika (EUA) prontu koopera ho Governu Timor-Leste hodi apoia servisu Polisia Nasionál Timor-Leste (PNTL) ba kombate  krime tráfiku umanu no krime organizadu iha Timor-Leste.

The International Law Enforcement Academy (ILEA) husi Estadu Unidu Amerika (EUA) halo enkontru ho Ministru Interior Interino, Filomeno da Paixão de Jesus, kinta 23/01/2020). Imajen/MI

Kometimentu ne’e hato’o diretamente husi Diretór ILEA,  Andre Cunnej bainhira hala’o vizita kordiál ba Ministériu Interior hodi hasoru malu ho Ministru Interior interinu, Filomeno da Paixão de Jesus, ohin, iha salaun Ministériu Interior, Vila Verde, Dili.

Delegasaun ILEA  halo vizita mai Timor-Leste hodi introdús kooperasaun ba área seguransa iha rejiaun Sudeste Aziátiku no mós kontinua reforsa kooperasaun iha área formasaun adekuadu ba membru PNTL hodi hadi’a sistema kombate tráfiku umanu no krime organizadu.

“Kada tinan ofisial polisiál Timoroan sira sempre partisipa iha formasaun programa ILEA nian ne’e. Ba tinan ida ne’e, ami sei aumenta tan númeru partisipasaun membru polisia sira husi Timor-Leste liu-liu partisipasaun Ajente Polisiál husi Timor-Leste nian ba iha programa ILEA,”  hateten Andre Cunnej.

Andre ho haksolok deklara kometimentu ILEA hanesan Akademia Polisia Internasionál ne’ebé reinu nasaun membru sira iha Sudeste Aziátiku tomak sempre koopera no ajuda membru polisia nasaun barak.

“Ida ne’e, ita halo parseria entre Reinu Tailándia ho Estadus Unidus, atu fó formasaun ba ajente polisia sira iha rejiaun ne’e, hodi luta kontra krime organizadu sira ne’ebé akontese iha Rejiaun ne’e,” hateten Diretór ILEA ne’e.

Ministru Interiór Interinu, Filomeno da Paixão de Jesus, apresia ho apoiu husi programa ida ne’e, hodi hametin relasaun iha área kapasitasaun no servisu hamutuk ka hodi troka informasaun iha futuru. Nune’e ba oin bele esforsu hamutuk kombate krime internasionál. Treinamentu hirak ne’ebé sei fornese husi ILEA ne’e ho métodu komprovadu no efikás liga liu ho asuntu polisiál nian.

Notísia Relevante : Austrália ‘Alerta’ ba Nasaun Hotu Hamutuk Kontra Terrorizmu

Iha novembru 2019, Ministru Filomeno rasik hala’o vizita ba Austrália hodi partisipa  konferénsia ministeriál internasionál kontra finansiamentu terrorizmu ho tema “No Money for terror” ne’ebé hala’o iha Melbourne Convention Center Austrália.

Iha enkontru ne’e, Ministru Interna Austrália, Hon Peter Dutton halo “alerta” ida ba nasaun hotu- hotu atu servisu hamutuk kontra turizmu.

Jornalista : Eugénio Pereira  

Editór       : Francisco Simões

HAKEREK NO HATÁN

Please enter your comment!
Please enter your name here