Komandante Jerál F-FDTL, Majór Jenerál Lere Anan Timur ho Komandante Jerál PNTL, Komisáriu Faustino da Costa ho komandante sira hala’o deklara konjuntu hodi garante seguransa iha territóriu Timor-Leste. Imajen/Eugénio Pereira

DILI, 23 janeiru 2020 (TATOLI)- Komandante Jerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, ho Komandante Jerál PNTL, Komisáriu Faustino da Costa, ohin, halo deklarasaun konjuntu hodi garante seguransa iha territóriu Timor-Leste hodi apoia solusaun ba diálogu nasionál ne’ebé Xefe Estadu inisia hodi rona hanoin sira husi lider partidu polítiku sira kona-ba solusaun atu hetan konsensu ba situasaun polítika atuál.

Notísia Relevante : Arsebispu husu Haforsa Seguransa iha Fronteira, Aeroportu ho Portu

Lere Anan Timur afirma, Timor-Leste labele moris iha impase polítika ida ne’ebé naruk, tanba valór luta ne’ebé uluk kuda metin iha ema hotu nia neon no fuan laran hanesan domin ba malu, domin ba rain, abnegasaun, espíritu ba sakrifísiu nasionalizmu ho patriotizmu, ka lealdade ba nia rain raan fakar fatin hahú mihis ba daudaun.

Problema hirak ne’e hotu, tuir Lere, mai husi konsekuénsia ema nu’udar  umanu ba nia egoízmu, nia ambisaun ba sasán mundu nian hanesan podér polítika sira tenke tau aas interese nasionál povu no nasaun nian.

Komandante FALINTIL  ne’e husu atu Maun Boot, Kay Rala Xanana Gusmão, José Ramos Horta, Mari Alkatiri, Francisco Guterres Lú Olo no Taur Matan Ruak, tuur hamutuk solusiona krize polítika ne’e atu ema labele aproveita tempu fahe fali lider sira nasionalizmu no patriotizmu.

“Ami husu ba maun boot sira bele fó liman ba malu atu fó solusaun ba impase polítika nasionál naruk ne’ebé oras ne’e ita nia hasoru, tanba nia konsekuénsia povu ai leba sira maka simu, envezde simu promesa kampaña eleitorál sira liubá,” dehan Lere.

Tuir observasaun Komandu forsa rua nian katak, bainhira krize polítika ne’e la iha solusaun ema terseiru pesoa bele aproveita tempu lansa kualkér krime liu husi grupu organizadu hodi lasu eis grupu organizasaun arte marsiál bele kria konflitu iha rai laran.

“Ami haree  ema balun ne’ebé la iha espíritu nasionalizmu no patriotizmu, aproveita fali oportunidade hodi implementa sira nia planu longu prazu ne’ebé fó biban ba ema terseira pesoa atu realiza sira nia objetivu iha sistema favoritizmu ne’ebé kria iha instituisaun estadu ka governu nian laran too sosiedade nia leet hodi organiza grupu krime organizadu no grupu arte marsiál nia leet,” dehan Lere.

Tuir nia haree, agora daudaun ema balun sai defensór  hodi fó korajen ba kriminozu sira ne’ebé buka perturba lei no orden iha  territóriu Timor afeta ba ekonomia rai laran hasoru problema oin-oin  no aumenta dezempregu hodi soran povu no lider sira lidera rai ne’e iha tempu susar laran no hatún kredibilidade lider no kredibilidade nasaun.

Haree ba preokupasaun hira ne’e hotu, Komandu F-FDTL no PNTL apela ba veteranu frente armada, klandestina,  diplomata no povu asuwa’in sira atu hametin nafatin dame no kaer metin nafatin prinsípiu ukun aan no mantein unidade nasionál hodi liberta povu husi ignoránsia kiak no mukit.

“Ita tenke matan moris neon na’in nafatin atu labele fasil monu ema nia intensaun atu halakon soberanu Timor-Leste nian  ne’ebé ita rasik mak harii durante funu naruk ne’ebé ita rasik maka hasoru,” Lere alerta.

Lere hatuan, lider nasionál sira tenke hanoin halo reflesaun hodi kaer metin nafatin valór luta no unidade iha tinan 24 nia laran atu labele husik hela povu Timor-Leste maka sai vítima.

Tuir nia haree, bainhira situasaun polítika ne’e rezolve sei fó benefísiu ba povu no nasaun bele servisu hamutuk hodi hadi’a ekonomia nasaun no implementa projetu no planu programa sira ne’ebé estadu kria ona.

 Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here