Estádiu Dili. Foto Google.

DILI, 23 janeiru 2020 (TATOLI)–Diretora Nasionál Administrasaun no Finansa Sekretaria Estadu Juventude no Desportu (SEJD), Maria Luísa Monteiro hateten prosesu konstrusaun Estádiu Munisipál Dili daudaun ne’e iha ona faze finál verifikasaun ne’ebé hala’o hosi Ajénsia Dezenvolvimentu Nasionál (ADN) no SEJD nu’udar na’in ba projetu.

“Estádiu Dili agora iha ona faze verifikasaun finál iha ADN, Obra Públika no SEJD rasik. Durante ne’e, ekipa sira serbisu maka’as loos. Maibé, atu halai ba konkursu ne’e depende ba Konsellu Administrasaun Fundu Infraestrutura mak sei haree. Prosesu normál hanoin labele. Ita haree prosesu normál han tempu to’o fulan neen kada projetu, entaun orsida Konsellu Administrasaun Fundu Infraestrutura (KAFI) maka sei deside atu aselera lalais,” Diretora tenik ba Agência Tatoli iha edifísiu SEJD, Lecidere, Dili, kinta ne’e.

Nia dehan SEJD daudaun ne’e esforsu maka’as hela atu finaliza lalais obra refere nune’e bele realiza jogu Komunidade Nasaun Ko’alia Lian Portugeza (CPLP-sigla Portugés) iha jullu mai ne’e.

Fó hanoin fali katak projetu reabilitasaun ba Estádiu Munisipál Dili antes ne’e kaer hosi kompañia Marino Interprise ho montante orsamentu hamutuk millaun $1.5 no Governu konsege selu ona pursentu 70. Tanba la konsege finaliza obra refere, foin lalais ne’e KAFI hamutuk ho ADN foti ona desizaun hodi hapara kompañia refere no atu loke fali konkursu foun ba kompañia seluk atu kontinua hikas obra ne’e.

“Kona-ba atu loke fali konkursu foun ne’e sei entrega ba KAFI mak sei haree. Entaun, semana agora ne’e ami sei hala’o reuniaun ho Grande Projetu para haree oinsá bele loke konkursu urjente atu kompañia foun bele hala’o lalais serbisu nune’e bele finaliza obra ne’e,” nia haktuir.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here