Sekretáriu Jerál Partidu CNRT, Francisco Kalbuadi Lay, entrega karta ba Prezidente Repúblika, Francisco Guterres Lú Olo. Imajen Tatoli/Egas Cristóvão

DILI, 23 janeiru 2020 (TATOLI)–Líder husi partidu Congresso Nacional de Reconstrucão de Timor (CNRT), hasoru-malu ona ho Prezidente Repúblika (PR), Francisco Guterres Lú Olo iha ámbitu diálogu nasionál, no hato’o ona opiniaun eskrita hodi hein evaluasaun husi Xefe Estadu. 

“Ami husi CNRT seidauk iha hanoin buat ruma, tanba ami sei rona uluk husi Prezidente Repúblika nia hanoin. Opiniaun ne’ebé CNRT hato’o pur-eskrita no hein evaluasaun husi Prezidente Repúblika tanba partidu hotu sei mai hato’o idak-idak nia opiniaun”, Sekretáriu Jerál CNRT, Francisco Kalbuadi Lay deklara ba mídia, hafoin enkontru ho Xefe Estadu iha Palásiu Prezidente Nicolau Lobato, Bairru Pité, Dili, ohin.

Kalbuadi esplika, tuir Konstituisaun Repúblika Demokrátika Timor-Leste (KRDTL) artigu 74 katak hotu-hotu tenke mai rona fali orientasaun ne’ebé maka Prezidente Repúblika sei foti.

Maibé, nia hatutan, tuir buat ne’ebé kuadru CNRT rona husi Prezidente Repúblika katak, komesa ohin bá oin, Prezidente Repúblika sei konvida partidu sira seluk, ho tan sosiedade sivíl, konfisaun relijioza sira inklui komponente hotu iha rai ida-ne’e, nune’e bele mai buka solusaun ne’ebé di’ak atu solusiona situasaun ida-ne’e.

“Ami mai iha-ne’e hatudu vontade, ho orientasaun ne’ebé Prezidente hato’o. Ami husu boot ba povu liuliu ba joven sira atu hakmatek. Ita hotu-hotu sei rona orientasaun no desizaun husi Prezidente Repúblika, maibé hotu-hotu tenke ho vontade, ho laran-moos tebes atu buka solusaun ho domin no dame”, nia subliña.

Kalbuadi lori kuadru CNRT agradese ba Prezidente Repúblika, Francisco Guterres Lú Olo, ne’ebé mak konvida ona partidu CNRT.

“CNRT onra teb-tebes no haksolok bele mai hato’o hela hanoin ne’ebé maka hotu-hotu hatene hafoin Orsamentu Jerál Estadu (OJE) 2020 la pasa iha debate jeneralidade iha Parlamentu Nasionál (PN)”, nia haktuir.

Iha soru-mutuk ne’e, Sekretáriu Jerál Partidu CNRT, Francisco Kalbuadi Lay, akompañadu husi kuadru sira hanesan Terezinha Viegas, Duarte Nunes, Virgílio Smith no Maria Rosa da Câmara ‘Bissoi’.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here