Xefe Departamentu Sinál no Tránzitu Diresaun Nasionál Transporte Terrestre (DNTT), João Eugénio da Silva. Imajen/ Tatoli Egas Cristovao.

DILI, 23 janeiru 2020 (TATOLI) – Xefe Departamentu Sinál Tránzitu Diresaun Nasionál Transporte Terrestre (DNTT), João Eugénio da Silva, kontinua husu motorista sira atu uza farda (uniforme) iha ámbitu buka no tula pasajeiru.

“Bainhira motorista sira lori mikrolete no taxi maka la uza uniforme, DNTT iha obrigasaun tenke aplika multa dólar 40 ho baze lei númeru 5/2010”, nia dehan ba TATOLI iha Balidi, ohin.

Kuandu motorista transporte públiku ne’ebé la uza uniforme viola artigu 14 no 411 DM númeru 3/MTCOP/2003 ho valór $5 to’o $70 no taxista la uza uniforme kór verde ne’ebé define ona hosi DNTT viola Diploma Ministeriál (DM) númeru 5/2010 artigu 7 pontu 2 (a) númeru 5 husi $15 to’o $40.

Nune’e maka DNTT kontinua alerta ba motorista sira atu kumpre regra sira bainhira lori taxi ka mikrolete, tanba sansaun multa ne’e aplika beibeik ona.

Hodi dehan ezemplu di’ak maka karreta Argo hosi empreza Devita Group nian, tanba sira rasik prepara uniforme ba motorista no uza tuir regra. “Entaun patraun ba mikrolete no taxi mós tenke foti referénsia, atu nune’e tránzitu sira labele prende”.

Iha sorin seluk, motorista mikrolete 010, Luciano de Deus, afirma baibain kumpre regra ka uza farda bainhira halo serbisu, maibé kuandu tuku 11-resin, pasiénsia tenke hasai tanba kosar no dalaruma la uza tanba farda fo’er no iis, no par ida de’it ho presu $45.

“Ami hakarak husu ba DNTT, karik bá oin tenke haree kestaun ne’e, se bele propoin tan farda ho kór seluk atu ami bele uza troka malu”, sujere.

Nune’e mós, taksista Silvestre Mendonça, realsa normalmente uza farda hafoin halo operasaun hodi tula pasajeiru maibé manas no kosar, entaun tenke troka tanba ta’uk iis.

“La’ós ami la kumpre, farda ne’e ami maka suku rasik, patraun la prepara, ami suku $45 kedan tanba ne’e satu pasang de’it, entaun ida de’it labele uza ba semana ida”, salienta.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here