Prezidente APORTIL, Flávio Cardoso Neves. Imajen/António Gonçalves.

DILI, 23 janeiru 2020 (TATOLI) – Autoridade Portuária Timor- Leste (APORTIL) daudaun ne’e, prepara ona timoroan na’in-lima atu sai tripulante ba ró Nakroma.

“Hodi troka ema na’in-lima ne’ebé sidadaun estranjeiru (Indonéziu) iha ró laran”, Prezidente APORTIL, Flávio Cardoso Neves, ba TATOLI iha Portu Dili, ohin.

Oitavu Governu liuhusi Ministériu Transporte no Komunikasaun (MTK) fó ona orientasaun ba APORTIL atu promove timoroan sira sai tripulante ba ró Nakroma iha tinan ne’e.

Tanba durante ne’e, ema estranjeiru (Indonéziu) de’it mak halo jestaun ba Nakroma, ne’ebé hahú iha 2020 tenta identifika ona fatin lima atu timoroan bele tama hodi haknaar iha ró.

“Ita hakarak ema estranjeiru ne’e kontinua kapitaun ba ró no tékniku ba haree mákina, maibé seluk hanesan dada tali no hamoos mákina no ró ne’e timoroan, mas ita-nia ema mós bele akompaña sira bainhira hatene, bele jere rasik ita-nia ró”, katak.

Hodi dehan daudaun kapitaun ho tripulante 16 ne’e kuaze sidadaun Indonézia, ne’ebé iha 2020 ne’e, timoroan na’in-lima komesa hala’o jestaun mós ba ró Nakroma.

“Aban, ita-nia ró to mai, ita hahú foku ba planu promove timoroan sai mós tripulante ba ita-nia Nakroma ne’e”, adianta.

Prezidente APORTIL ne’e dehan se la hahú ida ne’e, oinsá mak bele prepara ema tanba Timor-Leste mós hahú sosa ona ró Nakroma II. “Atu sosa tan barikasa no grasa Deus ró haksolok mai tan, entaun ita iha ró más ema laiha atu jere”, katak.

Aléinde ne’e, hanoin mós atu komesa prepara timoroan sai kapitaun ba Nakroma I no II, tanba hakarak timoroan rasik mak jere no lori, mas presiza orsamentu ba kapasitasaun iha área espesialidade tasi no kapitaun ró.

Politikamente Governu Timor-Leste liuhusi MTK asina ona akordu (MoU, sigla inglés) ho Ministériu Transporte Indonézia atu implementa polítika formasaun no kapasitasaun ba timoroan sira.

“Mas problema mak implementasaun ne’e orsamentu prevee iha tinan ne’e, mas sumba iha Parlamentu Nasionál afeta ba formasaun ba timoroan sira”, afirma.

Notísia relevante : Tenke Promove Timoroan Sai Tripulante ba Nakroma

Jornalista : Florencio Miranda Ximenes

Editora : Maria Auxiliadora

1 KOMENTÁRIU

  1. Sr. Presidente…hadiak uluk jestaun manutensaun ba Ro Nakroman uluk lai…atu manutensaun deit persija kuaze fulan 5 resin kedas ne’e oinsa??? Ami povu beik tein ne’e persija transporte martima liu-liu ami sira hosi Oekusi no Atauro.

    Obrigado

HAKEREK NO HATÁN

Please enter your comment!
Please enter your name here