Sekretáriu Estadu Kooperativa, Arsenio Pereira da Silva. Imajen TATOLI/Egas Cristovão

DILI, 22 janeiru 2020 (TATOLI) – Sekretáriu Estadu Kooperativa (SEKoop), Arsénio Pereira da Silva, hateten Dotasaun Orsamentu Temporáriu (DOT) ne’ebé Ministériu Finansa aloka ba SEKoop ho montante $284,971, utiliza ba funsionamentu serbisu, formasaun jestaun ba kooperativa sira no kapasita tékniku sira atubele hatene ka’er mákina.

“Orsamentu duodésimu ne’ebé ami simu sufisiente ba funsionamentu mákina Estadu kontinua la’o, liuliu ba saláriu no vensimentu no viajen lokál para atu halo monitorizasaun ba servisu sira ne’ebé tinan kotuk ita halo ona”, SEKoop ba TATOLI iha Palásiu Governu, tersa ne’e.

Arsénio dehan daudaun ne’e hetan konvite barak husi área rurál liuliu kooperativa sira atu kontinua fó formasaun ba fortalesimentu kooperativa sira atubele jere bainhira iha rendimentu ona.

“Ami halo hela planu atu hala’o formasaun ba kooperativa sira no mós fó formasaun ba ekipa téknika sira atu iha abilidade ka’er mákina prosesamentu (sorghum) sira ne’ebé ita atribui ona”, katak.

Hodi dehan iha fulan ne’e, fó formasaun ba kooperativa iha área jestaun ba iha Manufahi, Covalima, Ainaro no Lautem.

Nune’e, SEKoop husu ba funsionáriu sira kontinua serbisu hanesan baibain hodi fó atendimentu ba públiku, tanba orsamentu iha ba saláriu no vensimentu.

“Orsamentu duodesimál ne’e kada fulan nian ne’ebé tenke halo planu ba orsamentu ne’ebé iha depois halo relatóriu hatama iha fulan ikus”, garante.

Alokasaun DOT janeiru 2020 ba SECOOP hamutuk $284,971 fahe ba kategoria sira hanesan saláriu no vensimentu $37,305 sasán no serbisu $122,833 no transferénsia públiku $124,833.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here