Prezidente Repúblika, Francisco Guterres Lú Olo, kumprimenta Ministru Defesa, Filomeno Paixão no Xefe Estadu Maior Jenerál F-FDTL, Lere Anan Timur, iha serimonia toma posse Vise Xefe Estadu Maior Jenerál F-FDTL, Falur Rate Laek, ne’ebé hala’o iha Palásiu Prezidensiál, segunda (1/10/2018). Imajen António Goncalves

DILI, 22 janeiru 2020 (TATOLI)–Hahú aban (23/01), Prezidente Repúblika (PR), Francisco Guterres Lú Olo sei konvoka diálogu nasionál ho entidade sira hotu atu buka solusuan ba situasaun atuál, hafoin Orsamentu Jerál Estadu (OJE) 2020 xumba iha Parlamentu Nasionál (PN). 

Nune’e, molok realiza diálogu nasionál ne’e, ohin, Prezidente Repúblika konvida Ministru Defeza no Ministru Interiór Interinu, Filomeno da Paixão de Jesus hamutuk ho líder másimu husi instituisaun Defeza no Seguransa atubele reforsa liután seguransa, perante diálogu ne’e.

“Ohin, Prezidente Repúblika bolu ha’u hanesan Ministru Defeza no Ministru Interiór Interinu, hamutuk ho Xefe Estadu Maiór Jenerál FALINTIL-Forsa Defeza Timor-Leste, Majór Jenerál Lere Anan Timur ho Komandante Jerál Polísia Nasionál Timor-Leste, Faustino da Costa, atu rona orientasaun uitoan ba situasaun seguransa nasionál. Nune’e mós, fó hatene katak hafoin orsamentu 2020 la pasa iha PN, nune’e, sei iha loron 60 atu Prezidente Repúblika konsulta ho líder hotu, polítiku, naun polítiku, hamutuk atubele hetan konsensu nasionál ida-ne’ebé lori ita atu bá forma fali Governu foun, ka atubele hetan situasaun di’ak ida hodi ultrapasa situasaun impase ne’ebé mak iha”, Filomeno Paixão hateten lia hirak-ne’e, hafoin hasoru-malu ho Xefe Estadu iha Palásiu Prezidente Nicolau Lobato, Bairru Pité, Dili, ohin.

Paixão dehan, situasaun iha territóriu di’ak hela, situasaun nafatin de’it, normál hela, maibé, Prezidente Repúblika iha nafatin devér atu fó atensaun, enkuantu nia sei dezenvolve hela situasaun ida atu halo diálogu entre líder sira.

“Husi ami rasik sei buka atu haree Diretiva Polítika ida ba komandu rua atu koordenadamente halo seguransa ba iha kapitál Dili, nune’e situasaun ne’e bele konduzivu, atu diálogu nasionál ne’e bele la’o ho di’ak no susesu. Komandu rua kompromete sei asegura diálogu nasionál ne’e”, Ministru promete.

Hanesan ema rezistente ida, Filomeno mós fiar katak liuhusi diálogu nasionál ne’e sei ultrapasa situasaun ne’e.

“Sei iha solusuan ba situasaun atuál tanba ne’e ita-nia konviksaun dezde uluk to’o agora. Ita iha esperiénsia barak ona kona-ba ida-ne’e. Dezde 2004, 2006, ita hasoru problema maibé ita hatene hadi’a-an”, Paixão fiar.

Nune’e, Ministru Defeza apela ba forsa armada no membru PNTL tomak katak komandu ida de’it no laiha komandu rua, tanba ne’e husu ba membru sira atu rona de’it órden husi komandante.

Ba povu tomak, inan aman, estudiante no foin-sa’e sira, Paixão reprezenta Governu hodi apela katak mantein atividade loroloron, halo negósiu, bá eskola, bá serbisu, hala’o atividade hanesan baibain, laiha problema.

“Agora bá oin, seguransa iha lurón sira sei reforsa liután, no seguransa iha territóriu tomak sei reforsa liután. Haree hakmatek, hala’o imi-nia atividade hanesan baibain. Fó tempu ba ita-nia nai-ulun sira hakbesik-an mai iha-ne’e (Palásiu Prezidensiál), ko’alia ho Prezidente Repúblika atu ko’alia hamutuk buka solusaun ba problema ne’ebé iha, buka konsensu nasionál”, nia apela.

Entretantu, Prezidente Repúblika hasai ona konvite hodi konvida entidade sira atu hala’o diálogu, ne’ebé sei hahú realiza iha 23 janeiru 2020.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here