Vise-Prezidente Parlamentu Nasionál, Maria Angelina Sarmento. Foto Egas Cristóvão

DILI, 22 janeiru 2020 (TATOLI)—Vise-Prezidente Parlamentu Nasionál, Deputada Maria Angelina Lopez Sarmento, hateten dezde proposta orsamentu la pasa iha jeneralidade, to’o oras ne’e seidauk iha ajenda ba plenária.

“Funsionamentu Parlamentu la’o normál hela, soké iha segunda no tersa seidauk konsege realiza plenária hafoin orsamentu xumba tanba normalmente tuir rejimentu, atu hala’o plenária presiza iha reuniaun líder bankada mak deside ajenda plenária tuirmai”, Maria Angelina ba jornalista sira, iha resintu Parlamentu Nasionál, kuarta ne’e.

Nia dehan, maski seidauk iha ajenda ba plenária, maibé Komisaun Espesializada sira funsiona normál.

“Ita akompaña to’ok finde semana ida-ne’e. Se Prezidente Parlamentu konvoka reuniaun líder bankada, ita haree to’ok ajenda saida mak preizidente sei propoin, tanba ita ko’alia kona-ba lala’ok Estadu nian agora daudaun ita bá fali rejime duodésimu ona”, nia esplika.

Tuir nia, orsamentu jerál 2019 nian ba Parlamentu Nasionál (PN), restu hela millaun $250, no agora millaun $166,4 ba duodésimu.

Jornalista sira tenta konfirma ho Prezidente Parlamentu Nasionál, maibé seidauk bele fó komentáriu kona-ba ajenda plenária.

Tuir informasaun hosi fonte seluk ne’ebé Agência TATOLI asesu katak, aban, sei iha reuniaun líder bankada hodi trata ajenda ba plenária.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here