Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 22 janeiru 2020 (TATOLI)–Vise-Prezidente Parlamentu Nasionál, Maria Angelina Lopez Sarmento, espera iha fulan-marsu tinan ida-ne’e bele iha ona serteza polítika, tanba povu rai ida-ne’e labele terus tan ho polítika inserteza.

Tuir nia, povu rai ida-ne’e iha mehi ba moris di’ak, tanba ne’e labele sakrifika tan povu ba interese partidária ka interese grupu.

“Orsamentu ne’ebé sei restu hosi 2019 nian mak millaun $250. Iha janeiru nia laran hasai ona millaun $116.4 uza ba duodésimu. Entaun, restu hosi ida-ne’e ita bele dehan bele uza tan fulan-rua (fevereiru no marsu). To’o marsu ita tenke iha serteza polítika ona”, Maria Angelina ba Agência TATOLI, iha Parlamentu  Nasionál, kuarta ne’e.

Nia hateten katak konsekuénsia negativa hosi Eleisaun Antesipada mak iha parte polítika, maibé iha parte ekonomia, konsekénsia sempre iha. Entaun, hein impase polítika ida agora ne’e depende ba desizaun Prezidente Repúblika nian.

Tuir ajenda, ohin, Prezidente Repúblika sei konsulta ho entidade Estadu sira hodi husu hanoin kona-ba situasaun polítika atuál.

Deputadu Maria Angelina hatutan, Primeiru-Ministru rasik mós hanesan líder Partidu Libertasaun Populár (PLP), nia dehan ona katak atu bá fali Eleisaun Antesipada ka konjuntura polítika ne’e atu sai oin seluk fali mós nia prontu hasoru iha kualkér situasaun.

“Entaun, bá-oin, ita hein de’it desizaun polítika hosi Prezidente Repúblika, atu hola desizaun ida-ne’ebé prudente liu, nune’e labele kontinua sakrifika povu ida-ne’e. Ita iha ona presedénsia ne’ebé ita liu iha 2018 no impase polítika ne’ebé akontese iha 2017 ne’ebé ita hakat ona Eleisaun Antesipada”, nia subliña.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here