Sekretáriu Jerál LFA, Alexandre Vong (karuk), akompaña husi Diretór Verifikasaun no Lisensa LFA, José Carvalho (loos) halo konferénsia imprensa. Imajen Tatoli: Hortencio Sanchez

DILI, 22 janeiru 2020 (TATOLI)–Sekretáriu Ezekutivu Liga Futeból Amadora ( LFA), Alexandre ‘Lexy’ Vong hateten desizaun ne’ebé Diretór Étika no Disiplina LFA,  Octaviano da Conceição foti la reprezenta órgaun ezekutivu maibé deklarasaun pesoál.

“Ha’u hanoin problema ne’ebé iha hanesan problema pesoál ida-ne’ebé loloos la merese atu fó-sai ba públiku. Tanba ne’e, desizaun ne’ebé ohin Diretór Étika no Disiplina foti ne’e desizaun ida-ne’ebé la’ós reprezenta LFA maibé desizaun pesoal,” Lexy ba jornalista iha Bairru Formosa, Dili, kuarta ne’e.

Lee mós: LFA Demite Lexy Vong Hosi Kargu Sekretáriu Ezekutivu

Nia dehan, bazeia ba rezultadu hosi reuniaun ne’ebé hala’o iha 20 janeiru liubá fó alternativa ba nia hodi buka solusaun ba problema ne’ebé nia hasoru.

“Ami seidauk iha reuniaun ida atu hola desizaun mai ha’u. Ohin, ha’u rona sira deklara demite ha’u. Ha’u hakfodak. Kestaun administrativa liuhosi fallansu ne’ebé ami halo sei iha prosesu nia laran atu rezolve. Loloos hanesan Diretór ba Disiplina no Étika nia tenke simu kompeténsia hosi órgaun ezekutivu hafoin hola desizaun. Foin lalais iha duni reuniaun maibé ko’alia kona-ba asuntu hodi delega membru na’in-tolu atu prepara kongresu. Laiha tan asuntu seluk atu ko’alia. Reuniaun ne’e mós ha’u la marka prezensa tanba rezolve hela problema ne’ebé iha,” nia haktuir.

Nia argumenta, hanesan ema ne’ebé barak liu mete iha futeból sente triste no la satisfáz ho desizaun ne’ebé foti ba nia.

“Ohin ha’u simu karta ne’e ha’u hakfodak no sente triste tanba hanesan ema ne’ebé mete iha futeból dezde uluk kedas no hanesan mós fundadór ida ba LFA, konsidera desizaun ne’e la’ós desizaun koletiva,” nia subliña.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here