Labele lori sasán kro'at sira ne'e iha fatin públiku. Imajen/Egénio Pereira

DILI, 22 janeiru 2020 (TATOLI) – Komandu Jerál Polisia Nasionál Timor-Leste (PNTL) hatún ona orientasaun ba Komandu Polisia Munisipiu Dili koordena ho Unidade Espesiál Polisia (UEP) atu reativa operasaun iha tempu kalan no loron hodi evita aktu krime ne’ebé kontinua akontese iha kapitál Dili.

Notísia Relevante : Grupu ho Atributu Arte Marsiál Taa Membru PNTL

Komandante PNTL Munisípiu Dili, Superintendente Xefe Armando Monteiro. Imajen/Eugénio Pereira

Komandante Polisia Munisípiu Dili, Superintendente Xefe, Armando Monteiro, dehan, operasaun hala’o relasiona ho aktu krime ne’ebé lansa husi grupu organizadu balun, liuliu iha relasaun ho grupu arte marsiál ne’ebé taa Inspetór Polisia Honorio Horta Pinto, tersa (21/01/2020), iha area Aimutin, Dili.

“Ita reativa fila fali operasaun iha tempu kalan no loron para evita konflitu krime sira ne’ebé lansa husi grupu no indivíduu sira, hanesan taa ita nia membru polisia sira tuir loloos labele akontese,” afirma Armando Monteiro ba jornalista iha Komandu Polisia Munisípiu Dili.

Operasaun ne’e sei koordena ho autoridade suku no Ofisiál Polisia Suku no Konsellu Polisiamentu Komunitáriu (KPK) karik identifika bairru balun risku ba konflitu bele koordena ho seguransa hodi halo patrullamentu para atua kualkér krime labele mosu.

Komandante Polisia Dili ne’e apela ba juventude sira labele kontinua halo konflitu hodi taa no baku membru PNTL ho F-FDTL.

“La iha ona tempu no oportunidade ba kriminozu sira atu baku beibeik polisia no F-FDTL tanba ne’e demais liu ona, kuidadu!, ita bele uza forsa para hasoru,” Armando Monteiro hateten.

Parte seluk, Armando dehan, suspeitu sira ne’ebé taa kanek membru polisia iha tersa kalan, kaptura ema na’in neen (6) no horiseik, tuku 14:00 Otl, kaptura tan suspeitu prinsipál ida.

“Horiseik, ami kaer tan suspeitu prinsipál ida, sira na’in hitu (7) hein prosesu investigasaun hotu hodi aprezenta ba Ministériu Públiku,” Armando informa.

Superintendente Armando mós seidauk bele fó sai razaun no motivu loloos husi asaun krime ne’ebé suspeitu halo, tanba parte investigasaun kriminál sei kontinua elabora investiga profunda.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here